Gwobrau'n dathlu popeth sy'n dda am chwaraeon Sir Benfro

Mae'r Gwobrau'n cydnabod popeth sy'n dda mewn chwaraeon yn Sir Benfro, o bob camp, oedran a gallu, gan gynnwys y gwirfoddolwyr hynny sy'n gwneud popeth yn bosibl y tu ôl i'r llenni.

Cyflwynwyd y noson i'r gynulleidfa fawr gan Ceri Coleman-Phillips o BBC Wales Sport unwaith eto, gyda chymorth medrus Cris Tomos.

Enillydd y Wobr Cyflawniad Oes eleni oedd y pêl-droediwr Simon Davies.

Cafodd Simon yrfa wych yn yr Uwch Gynghrair, yn fwyaf arbennig gyda Fulham, Tottenham Hotspur ac Everton.

Sgoriodd yr asgellwr yn rownd derfynol Cynghrair Europa i Fulham yn 2010, enillodd 58 cap i Gymru, gan sgorio chwe gôl, ac roedd yn gapten ar ei wlad yn ystod gemau rhagbrofol Cwpan y Byd 2010.

Cafodd ei enwi'n Bêl-droediwr y Flwyddyn Cymru yn 2002 ac yn chwaraewr y tymor Fulham yn 2007-08, cyn gadael y clwb yn 2013. 

Ym mis Gorffennaf, y flwyddyn honno dychwelodd i glwb ei blentyndod, Solfach, a chwaraeodd yn erbyn St Ishmaels, gan dalu £3 am y fraint. 

O un cyn-chwaraewr rhyngwladol Cymru i un arall wrth i un o fawrion rygbi Cymru, Gareth Thomas, gyflwyno Gwobr Arbennig ar gyfer y noson.

Cyhoeddodd Gareth mai pêl-droedwyr Tîm Pêl-droed Stryd Merched Cymru oedd wedi ennill y wobr am eu camp anhygoel o gyrraedd rownd wyth olaf Cwpan y Byd i’r Digartref a gafodd ei chynnal yn Oslo.

Mae'r tîm yn hyfforddi yn Hwlffordd ac yn cynnwys pum merch anhygoel o Sir Benfro, y cyd-gapteiniaid Tor Planner a Marie Tilley, ynghyd â Claire Mantripp, Sam Lewtas a Bryony Davies.

Gwisgodd y chwaraewyr grys Cymru gyda balchder a chreu hanes, ond mae pob un wedi goresgyn adfyd personol - gan gynnwys digartrefedd, problemau iechyd meddwl ac allgau cymdeithasol.

Mae'r cysylltiad â Sir Benfro yn parhau trwy reolwr balch y tîm, Jo Price, cyn-gôl-geidwad Cymru ac Arsenal, ac ar y staff cymorth roedd Anji Tinley, Rheolwr Prosiect Ieuenctid a Chymuned Garth, sydd hefyd yn Gynghorydd Sir Penfro.

Cyflwynwyd gwobr y Cadeirydd ar gyfer 2025 gan Gadeirydd Cyngor Sir Penfro, y Cynghorydd Maureen Bowen.

Aeth y wobr i 'Cruising Free' o Glwb Rhwyfo Neyland, sydd wedi cwblhau un o heriau mwyaf y byd – rhwyfo Cefnfor yr Iwerydd.

Gan ddangos dewrder, dygnwch ac undod eithriadol, cwblhaodd Sophie Pierce, Janine Williams, Miyah Periam, a Polly Zipperlan y 3,200 milltir o rwyfo rhwng Lanzarote ac Antigua yn codi arian ar gyfer ffeibrosis systig a Paul Sartori.

Yn 32 oed, Sophie Pierce, sy'n byw gyda ffeibrosis systig, oedd y person cyntaf erioed â'r cyflwr i rwyfo’r cefnfor, a Janine Williams, 70 oed, oedd y fenyw hynaf mewn hanes i gwblhau'r gamp.

Ynghyd â Polly a Miyah fe wnaethon nhw brofi y gall gwaith tîm a dyfalbarhad oresgyn unrhyw rwystr.

Dyfarnwyd Gwobr Ysgol 2025 i Ffederasiwn Ysgolion Tafarn-sbeit a Thredeml.

Cafodd y ffederasiwn ei gydnabod am ei arloesedd fel yr Ysgol Parkrun gyntaf yn y DU, ar ôl datblygu cwricwlwm Parkrun gyda Parkrun UK.

Mae'r Ffederasiwn yn hyrwyddo Parkrun fel ffordd wych o helpu pobl i fod yn egnïol, cwrdd â ffrindiau a mwynhau bod yn yr awyr agored, tra hefyd yn hyrwyddo datblygiad arweinyddiaeth cryf trwy gynllun Llysgenhadon Parkrun.

Mae'r Ffederasiwn hefyd wedi dangos ethos ac arferion cynhwysiant cryf i sicrhau bod pob disgybl yn cael yr un cyfleoedd i brofi a mwynhau ystod o chwaraeon.

Mae hyn yn cynnwys offer addysg gorfforol wedi'i addasu, rasys cadair olwyn, a chydweithrediad Chwaraeon Sir Benfro a chefnogaeth ragorol i ddysgwyr difreintiedig, a amlygwyd gan Estyn fel arfer gorau.

Wrth grynhoi Gwobrau Chwaraeon gwych arall, dywedodd y Cynghorydd Rhys Sinnett, Aelod Cabinet dros Wasanaethau Trigolion: "Llongyfarchiadau i bawb a enillodd wobrau a phawb a enwebwyd.

“Rydym mor ffodus i gael sefyllfa chwaraeon mor gryf yma yn Sir Benfro a diolch i bawb sy'n gwneud cymaint o waith i sicrhau bod pobl o bob oed a gallu yn gallu cymryd rhan yn y chwaraeon maen nhw'n eu caru.

“Diolch hefyd i'n noddwyr Valero, Folly Farm, a Pure West Radio am eu cymorth i gynnal y dathliad hwn o chwaraeon yn Sir Benfro bob blwyddyn.”

Mae'r enillwyr fel a ganlyn:

Merched dan 16 oed                    Ava Tyrie (Ju Jitsu Brasil MMA Penfro)

Bechgyn dan 16 oed                    Ned Rees-Wigmore (Hoci)

Clwb y Flwyddyn                          Clwb Hoci Aberdaugleddau

Gwobr Anabledd Iau                    Jake Evans (Clwb Rygbi Llangwm)

Gwirfoddolwr Ifanc y Flwyddyn     Alannah Heasman (Ysgol Uwchradd Hwlffordd)

Tîm Iau                                          Clwb Pêl-droed dan 14 oed Merlin’s Bridge 2024/25

Arwr Tawel                                   Jenny Lewis (Clwb Pêl-droed Clarbeston Road)

Tîm Hŷn                                       Clwb Hoci Merched Abergwaun ac Wdig

Cyflawniad Gwrywaidd                 Liam Bradley (Triathlon)

Cyflawniad Benywaidd                 Sanna Duthie (Rhedeg)

Gwobr Chwaraeon Anabledd        Rachel Bailey (Boccia)

Trefnydd Clwb                              Silfan Rhys-Jones (Clwb Tenis Bwrdd Abergwaun)

Hyfforddwr y Flwyddyn                 James North (Clwb Pêl-droed Cilgeti)

Gwobr Ysgol                                 Ffederasiwn Ysgolion Tafarn-sbeit a Thredeml

Gwobr y Cadeirydd                      Cruising Free (Clwb Rhwyfo Neyland)

Gwobr Arbennig                           Pêl-droed Stryd Cymru

Cyflawniad Oes                           Simon Davies (CPD Cymru, Spurs, Fulham, Everton a Solfach)