Cerrig Glas yn Canu Roc a Rôl - Oes, wir! "Mae Eisteddfod ar y Gweill"

Cafodd y gân, a gyfansoddwyd gan y diweddar Richard Jones ac â geiriau gan Gareth Ioan, ei recordio gan tua 220 o ddisgyblion Blwyddyn 5 o ysgolion lleol yn ystod Gŵyl Hirddydd Haf ym Mis Mehefin. Cynhelir yr ŵyl flynyddol yng Nghanolfan yr Urdd Pentre Ifan gan Adran Addysg Sir Benfro a Menter Iaith Sir Benfro, ac roedd eleni’n gyfle perffaith i ddechrau croesawu’r Eisteddfod i’r ardal.

Yn wreiddiol wedi ei chyfansoddi ar gyfer sioe ieuenctid Eisteddfod yr Urdd Bro’r Preseli yn 1995, mae Hela’r Twrch yn olrhain hanes chwedl Culhwch ac Olwen tra’n dathlu hunaniaeth ardal y Preselau. Y llais gwrieddiol ar y recordiad hwnnw oedd neb llai na Lowri Evans, ac mae hi’n ôl gyda dau o leisiau mwyaf adnabyddus yr ardal, Einir Dafydd a Cleif Harpwood i groesawu Eisteddfod arall i’r ardal. Yn ymuno gyda’r tri mae’r cerddor Mei Gwynedd a oedd yn gyfrifol am drefnu, recordio a chynhyrchu’r fersiwn newydd. Y canlyniad? Trac llawn egni a balchder bro!

Bydd y gân yn cael ei rhyddhau, 21 Tachwedd, ac ar gael ar bob platfform ffrydio, gyda fideo lliwgar yn cael ei ryddhau ar YouTube yr un diwrnod.

Dywedodd Catrin Phillips, Swyddog Datblygu’r Gymraeg ar gyfer Cyngor Sir Penfro:

“Mae cymaint o falchder yn ein hardal ni - mae’r gwaith hwn yn dal egni a thalent ein pobl ifanc, ac mae’n ffordd wych o ddathlu’r iaith a’r diwylliant Cymraeg wrth i ni edrych ymlaen at groesawu’r Eisteddfod.”

Ychwanegodd y Cynghorydd John Davies, Cadeirydd Pwyllgor Gwaith Eisteddfod y Garreg Las:

“Mae’r cyffro eisoes yn cynyddu! Mae cymunedau Sir Benfro, de Ceredigion a gorllewin Sir Gâr yn llawn egni a chreadigrwydd wrth iddynt godi arian a pharatoi ar gyfer 2026. Mae’r gân hon yn dal yr ysbryd hwnnw’n berffaith.”

Bydd digon o gyfleoedd dros y misoedd nesaf i ysgolion, sefydliadau a chymunedau lleol gymryd rhan yn y paratoadau ar gyfer yr Eisteddfod.

Gwyliwch y fideo yma: https://youtu.be/NmsCLWPWSK8

Gwrandewch nawr: https://promo.theorchard.com/3lDnOFpauPi0fNd6NjBl