Cyngor yn cymeradwyo achos busnes terfynol y Porthladd Rhydd Celtaidd

Mae'r Porthladd Rhydd yn gyfle newydd i helpu Cymru i barhau i ddatblygu economi gystadleuol, gynhwysol a chynaliadwy yn fyd-eang.

Dywedodd y Dirprwy Arweinydd, y Cynghorydd Paul Miller, yr Aelod Cabinet dros Le, y Rhanbarth a Newid Hinsawdd: "Mae hwn yn gyfnod hynod gyffrous i ddyfrffordd y Ddau Gleddau ac i Sir Benfro gyfan.

“Ni allem fod yn cyd-fynd yn agosach â dyheadau Llywodraeth y DU a Llywodraeth Cymru o ran trawsnewid ynni a'n rôl yw sicrhau ein bod yn creu'r amodau cywir ar gyfer buddsoddi a thwf yma yn Sir Benfro ac ar draws rhanbarth De-orllewin Cymru.

“Mae maint y cyfle sydd o'n blaenau i Ddyfrffordd y Ddau Gleddau ac i Sir Benfro yn enfawr ac rydym yn benderfynol o sicrhau ein bod yn manteisio i'r eithaf ar y cyfle y mae'r chwyldro ynni hwn yn ei gynnig i dyfu economi Sir Benfro, i sicrhau buddsoddiad ac i greu a chynnal swyddi da.

“Mae'r diwydiant ynni yn elfen allweddol o economi Sir Benfro ac wedi bod ers y 1950au. Trawsnewidiodd dyfodiad y busnes hydrocarbon i ddyfrffordd y Ddau Gleddau y sir a'i ffyniant. Y diwydiant hwnnw yw'r prif rym economaidd yn Sir Benfro o hyd ond nid yw y grym yr oedd unwaith – gan fod pedair purfa wedi’u colli.

“Felly, mae angen i ni edrych i'r dyfodol, chwilio am gyfle ac ar hyn o bryd, rydym ar drothwy cyfle arall gyda'r potensial i fod mor drawsnewidiol â'r buddsoddiadau hynny yn y 50au.

“Mae'r cyfle hwn yn troi o gwmpas ynni glân, gwyrdd, adnewyddadwy yn y dyfodol ac yn benodol y potensial i Sir Benfro chwarae rhan allweddol yn y defnydd o ynni gwynt trwy ddylunio, saernïo, gweithredu a chynnal tyrbinau gwynt alltraeth – a hydrogen gwyrdd hefyd.”

Am fwy o wybodaeth am y Porthladd Rhydd Celtaidd ewch i'r wefan.