Y Cyngor i arddangos ffair swyddi yn Sioe Sir Benfro
Council to showcase jobs fair at the Pembrokeshire County Show
Mae Sioe Sir Benfro yn ôl unwaith eto – ac yn y digwyddiad eleni ar 20 a 21 Awst bydd Cyngor Sir Penfro yn rhoi cipolwg ar y rolau sydd ar gael yn yr Awdurdod.
Eleni penderfynwyd cymryd agwedd wahanol a defnyddio'r cyfle i arddangos y math o rolau sydd gennym o fewn yr Awdurdod yr ydym yn cael trafferth recriwtio iddynt – a thynnu sylw at y ffaith ein bod yn gyflogwr sy'n darparu cymorth rhagorol i weithwyr a chyfle i fwrw ymlaen â’u gyrfa yn y dyfodol.
Bydd ymwelwyr hefyd yn cael cyfle i gwrdd ag Aelodau'r Cabinet a'r Prif Weithredwr a chael gwybod am lu o brosiectau diddorol ac arloesol sy'n digwydd ledled y sir. Mae hyn yn cynnwys ailddatblygu Castell Hwlffordd a digwyddiad ymgysylltu ag ymgynghoriad gyda Chynghorau Tref a Chymuned.
Bydd y babell wedi'i lleoli gyferbyn â'r cylchoedd neidio a marchogaeth ym Mharth A (llain 9).
Fel dathliad o fywyd gwledig yn y sir, mae'r sioe yn llwyfan perffaith i ymgysylltu â chymunedau lleol ac ymwelwyr.
Dywedodd Prif Weithredwr Cynorthwyol y Cyngor, Richard Brown: “Mae ein timau'n llawn cyffro i gwrdd ag ymwelwyr a chael y cyfle i ddangos beth maen nhw'n ei wneud – ac amlygu'r ystod eang o gyfleoedd gyrfa sydd gennym i'w cynnig.
“Sioe’r Sir yw'r lle perffaith i ddathlu'r cynnyrch anhygoel sydd gennym i'w gynnig – ac i gwrdd â ffrindiau hen a newydd.
"Dewch i'n pabell a darganfod mwy yn ein ffair swyddi ac am ein prosiectau trawsnewidiol, a fydd yn gwella bywydau ein cymunedau a'n hymwelwyr. Edrychaf ymlaen at gwrdd â chi.”
Ychwanegodd y Cynghorydd Paul Miller, Dirprwy Arweinydd: "Mae Sioe’r Sir yn ddathliad poblogaidd a phwysig o fywyd gwledig yn Sir Benfro, ac rydym yn falch iawn o fod yn rhan o'r digwyddiad unwaith eto.
“Bydd ein staff a'n haelodau yn sgwrsio â llawer o bobl o gymunedau ledled Sir Benfro – galwch heibio i'n stondin a dweud helo – rydym yn edrych ymlaen at gwrdd â chi."
I gael y newyddion diweddaraf a rhagor o wybodaeth am wasanaethau'r Cyngor fydd yn Sioe Sir Benfro, ewch i'n cyfrifon cyfryngau cymdeithasol: