Cyffro i Arberth wrth i lyfrgell newydd agor yn yr Hen Ysgol

Cafwyd agoriad anffurfiol ar safle'r Hen Ysgol a ailddatblygwyd yn ddiweddar ddydd Iau, 26 Medi, a bydd agoriad ffurfiol yn cael ei gynnal ddiwedd y flwyddyn.

Roedd y llyfrgell wedi’i lleoli’n flaenorol mewn hen eglwys Wesleaidd ar St James Street ond erbyn hyn bydd mae’n mwynhau lleoliad llawer gwell, gyda digon o le parcio ar gael ym maes parcio Gwaun y Dref sydd gerllaw.

Cafodd y gwaith o adeiladu’r llyfrgell ar ffurf cragen sylfaenol ei hymgorffori yn y gwaith adeiladu ar gyfer safle gyfan yr Hen Ysgol, dan arweiniad dau o gyn-ddisgyblion yr ysgol.

Yn sgil cael grant o bron i £150,000 gan Lywodraeth Cymru, ynghyd ag arian cyfatebol gan Gyngor Sir Penfro, bu modd i’r llyfrgell gael ei chwblhau a’i gosod i safon uchel, gan gynnwys y dechnoleg ddiweddaraf o’r radd flaenaf, a fydd yn ymestyn yr amseroedd agor yn sylweddol.

Mae’r bartneriaeth hirsefydlog rhwng Cyngor Tref Arberth, Cyfeillion Llyfrgell Arberth a Chyngor Sir Penfro, yn parhau yn y llyfrgell newydd.

Dywedodd y Cynghorydd Rhys Sinnett, Aelod Cabinet dros Wasanaethau Preswylwyr: “Mae’n wych gweld y llyfrgell newydd yn barod i agor ei drysau i wasanaethu pobl leol unwaith eto.

“Er bod y gwaith wedi cymryd ychydig yn hirach nag yr oeddem yn ei obeithio, bu’n brosiect cymhleth gyda sawl sefydliad yn gweithio mewn partneriaeth i sicrhau bod gennym lyfrgell gynaliadwy a llwyddiannus i bobl Arberth.

“Fel maen nhw’n ei ddweud, mae'n werth aros am bethau da.”

Dywedodd Maer Cyngor Tref Arberth, y Cynghorydd Chris Walters: Ar ran Cyngor Tref Arberth rydym o’r diwedd yn llawn cyffro i ddweud ein bod wedi cwblhau proses drylwyr iawn a hoffwn ddiolch i bob aelod o’r cyhoedd am eu hamynedd wrth i ni weithio’n ffordd drwy’r broses gyfreithiol, fanwl hon. Hoffwn ddiolch am gydweithrediad cyfreithwyr Cyngor Sir Penfro a'n cyfreithiwr ni yn Hains a Lewis.

“Mae hwn yn gyfle gwych i’r dref ac mae’n wych gweld cyfleuster cymunedol newydd yn cael ei agor gyda chymorth Cyngor Sir Penfro a Llywodraeth Cymru. Hoffwn hefyd ddiolch i’r datblygwyr am roi'r adeilad hwn i’r dref.

“Rwy’n gwybod y byddai’r diweddar Gynghorydd Sue Rees wedi bod wrth ei bodd yn gweld hyn ei hun, felly byddwn yn cofio amdani ar y diwrnod agoriadol pan fyddwn, o’r diwedd, yn torri’r rhuban ac yn croesawu hen aelodau yn ogystal â rhai newydd, gobeithio, i Lyfrgell Arberth. 

“Gyda ffrindiau Llyfrgell Arberth yn rhedeg y llyfrgell, rwy’n gwybod bod aelodau’r cyhoedd mewn dwylo da ac unwaith eto rwy’n llongyfarch yr holl aelodau am gwblhau’r prosiect hwn o’r diwedd.”

Dywedodd Cadeirydd Cyfeillion Llyfrgell Arberth, a Chynghorydd Sir ward drefol Arberth, Marc Tierney: “Ers 2016, mae Cyfeillion Llyfrgell Arberth wedi cefnogi gwasanaeth llyfrgell poblogaidd ein tref. Nawr, ar ôl blynyddoedd o gynllunio gyda’n partneriaid a chyda chyllid Llywodraeth Cymru, rydym yn falch y bydd pawb sy’n defnyddio’r llyfrgell leol yn elwa ar y buddsoddiad mawr hwn yn ein tref.

“Mae gan Arberth lyfrgell y gallwn ni i gyd fod yn falch ohoni. Mae gwirfoddolwyr Cyfeillion Llyfrgell Arberth yn edrych ymlaen at groesawu wynebau cyfarwydd ac wynebau newydd i’n cartref newydd sbon yn Town Moor Mews.”