Cymorth ychwanegol yn helpu mwy o blant Sir Benfro i ddysgu nofio

Mae'r rhaglen graidd nofio ysgolion yn parhau i gael ei hariannu gan Gyngor Sir Penfro, gan roi mynediad i bob ysgol gynradd yn y sir i'r sgil bywyd hanfodol hon.

Diolch i'r Cyllid Gwaddol ychwanegol, bydd Hamdden Sir Benfro nawr yn gallu cyflogi hyfforddwr nofio cymwys ychwanegol i weithio ochr yn ochr â'r Hyfforddwr Nofio Ysgol presennol.

Bydd hyn yn caniatáu cefnogaeth fwy penodol i'r ysgolion a'r disgyblion hynny a fyddai'n elwa fwyaf, gan helpu i sicrhau bod pob plentyn yn cael y cyfle i ddod yn nofiwr hyderus a diogel.

Mae gwersi nofio ysgol yn cynnig llawer mwy nag amser yn y pwll – maent yn darparu cyflwyniad diddorol a phwrpasol i'r dŵr, gan ddysgu sgiliau hanfodol mewn nofio, hyder dŵr, a diogelwch y gall plant eu defnyddio trwy gydol eu bywydau.

Mae ymrwymiad Sir Benfro i nofio ysgol eisoes yn cyflawni canlyniadau cryf.

Yn ystod blwyddyn academaidd 2024/25, cyflawnodd 62% o blant ym Mlynyddoedd 3–6 y safon nofio genedlaethol, ymhell yn uwch na'r cyfartaledd cenedlaethol o lai na 40%.

Yn ogystal, cyflawnodd 80% o ddisgyblion sy'n gadael Blwyddyn 6 safon y Cwricwlwm Cenedlaethol, gan ddangos effaith buddsoddiad lleol parhaus a chyfarwyddyd pwrpasol.

Mae Hamdden Sir Benfro a'r Long Course Weekend yn llwyr gefnogi'r gred gan Nofio Cymru a Diogelwch Dŵr Cymru y dylai pob plentyn gael y cyfle i ddysgu nofio a chadw'n ddiogel o amgylch y dŵr.

Gyda'i gilydd, maent yn annog pob disgybl i gyflawni Gwobr Aur Ysgol Nofio - y safon ofynnol gydnabyddedig ar gyfer sgiliau nofio a hunan-achub erbyn diwedd yr ysgol gynradd.

Yn bwysig, mae pob ysgol gynradd yn Sir Benfro yn cael mynediad at wersi nofio ysgol ar hyn o bryd, gan sicrhau bod pob plentyn yn y sir yn cael y cyfle i ddysgu'r sgil bywyd hanfodol hon.

Mae'r cydweithrediad hwn rhwng Cyngor Sir Penfro, Hamdden Sir Benfro, Activity Wales a'r Long Course Weekend yn dangos pŵer partneriaeth wrth helpu pob plentyn i ffynnu, yn y dŵr ac allan o'r dŵr.

Dywedodd Matthew Evans, Prif Swyddog Gweithredol Long Course Weekend: "Mae canlyniadau ein Rhaglen Waddol wedi bod yn anhygoel - yn dyst go iawn o'r hyn y gellir ei gyflawni pan fydd cymunedau a phartneriaid yn dod at ei gilydd gyda phwrpas.

“Mae LCW wedi dod yn gymaint mwy na digwyddiad; mae'n ffordd o roi'n ôl, i ysbrydoli y genhedlaeth nesaf o blant Sir Benfro a buddsoddi ynddynt.

“Mae'r hyn y mae Mel [Morgan, Athrawes Nofio CSP] a'i thîm wedi'i gyflawni yn wirioneddol unigryw yng Nghymru. Eleni rydym yn mynd hyd yn oed ymhellach, gan lansio rhaglen nofio dŵr agored am ddim i blant - wedi'i gwneud yn bosibl dim ond trwy haelioni ein hathletwyr a chefnogaeth ddiwyro partneriaid fel Hugh James a Princes Gate Water, y mae eu cred yn y genhadaeth hon yn parhau i ddyrchafu'r Rhaglen Waddol i uchelfannau newydd.”

Dywedodd y Cynghorydd Rhys Sinnett, Aelod Cabinet y Cyngor dros Wasanaethau Trigolion: "Mae ein partneriaeth barhaus gyda'r Long Course Weekend, a gefnogir drwy eu cyllid gwaddol, wedi galluogi Hamdden Sir Benfro i wella ein rhaglen dysgu nofio mewn ysgolion.

“Mae'r cydweithrediad hwn wedi cyflawni ei nod o roi'r cyfle gorau posibl i blant ysgolion lleol ddatblygu'r sgil bywyd hanfodol hon. Rydym yn hynod ddiolchgar am eu cyfraniad, sydd, ochr yn ochr â'n darpariaeth graidd, wedi caniatáu inni ddarparu cymorth wedi'i dargedu sy'n gwneud gwahaniaeth gwirioneddol i'r rhai sydd fwyaf mewn angen.”