Cyrsiau gyrrwr aeddfed rhad ac am ddim ar gael yn Sir Benfro

Mae Cyngor Sir Penfro yn cynnal cyrsiau Gyrwyr Aeddfed rheolaidd, gyda'r nod o helpu i gadw modurwyr hŷn i yrru'n ddiogel am fwy o amser.

Cynhelir y cyrsiau yng Ngorsaf Dân Hwlffordd ac fe'u cynhelir rhwng 10am a 4pm.

Wedi'u hariannu gan Lywodraeth Cymru, maen nhw’n cynnwys:

• sesiwn anffurfiol yn yr ystafell ddosbarth yn y bore
• sesiwn yrru ymarferol yn y prynhawn gyda hyfforddwr gyrru cymeradwy.

Fe wnaeth Idwal David o Ddinbych-y-pysgod (yn y llun, chwith) ganmol y cwrs, ar ôl ei gwblhau yn ddiweddar.

"Dydych chi byth yn rhy hen i ddysgu ac rwy'n sicr wedi ehangu fy ngwybodaeth trwy ddilyn y cwrs hwn," meddai.

Mae'r sesiwn theori yn ymdrin â phynciau fel y Cod Priffyrdd, cyffyrdd a chylchfannau, gyrru tymhorol, ymwybyddiaeth o beryglon ac arwyddion ffyrdd.

Mae'r sesiwn ymarferol yn ymdrin â'r agweddau ar yrru mae'r cyfranogwr yn dymuno eu gloywi, megis parcio cyfochrog neu gylchfannau, yn ogystal â thechnegau gyrru mwy diogel cyffredinol.

Dywedodd Sally Jones, Swyddog Diogelwch y Ffyrdd nad yw'r cwrs yn brawf o sgiliau gyrru, nac yn asesiad ffurfiol o yrru.

"Rydyn ni eisiau eich cadw chi'n symudol, yn annibynnol ac yn hyderus y tu ôl i'r olwyn," meddai. "Gallwn ni hefyd fynd i'r afael ag unrhyw bryderon personol sydd gennych chi am eich gyrru nawr ac ar gyfer y dyfodol."

Mae rhai o'r sylwadau adborth yn cynnwys: 

"Rwyf fi wedi ailddysgu llawer o'r hyn y dylwn i fod wedi'i wybod, ond dros y blynyddoedd rwyf wedi anghofio."

'Fe wnaeth hyn wir helpu fy hyder; dylai pawb wneud y cwrs hwn - diolch i bawb."

"Gallaf nawr wneud cylchfan Morrison’s yn hyderus."

• Os oes gennych chi unrhyw gwestiynau, neu os hoffech chi gadw lle, e-bostiwch: road.safety@pembrokeshireshire.gov.uk neu ffoniwch 01437 775144 / 07767 173186.