Dathlu oes o wasanaeth i blant a phobl ifanc Sir Benfro

Cynhaliwyd digwyddiad diolchgarwch arbennig i Alex Allison, a'i ddiweddar wraig Dorothy, sydd wedi helpu llu o blant a phobl ifanc i ddod o hyd i'w ffordd mewn bywyd drwy eu croesawu i'w cartref.

Roedd Mr a Mrs Allison yn ofalwyr maeth yn Abergwaun am 32 o flynyddoedd, gan ddarparu cartref saff, diogel a meithringar i fwy na 100 o blant o bob oedran, o bob cefndir, ac mae llawer yn parhau i fod mewn cysylltiad heddiw.

Croesawyd Mr Allison ac aelodau o'i deulu, gan gynnwys ei gor-ŵyr naw mis oed, gan Gadeirydd Cyngor Sir Penfro, y Cynghorydd Pat Davies, ynghyd â’r Aelod Cabinet dros Wasanaethau Cymdeithasol, y Cynghorydd Tessa Hodgson.

Talodd Cyfarwyddwr Dros Dro y Gwasanaethau Cymdeithasol, Darren Mutter, deyrnged i Mr a Mrs Allison, y mae'n eu hadnabod ers ei gyfnod fel gweithiwr cymdeithasol dan hyfforddiant, gan gydnabod y bydd y rhan fwyaf o’r bobl yn yr adran gwasanaethau plant wedi gweithio gyda'r teulu dros y blynyddoedd.

"Mae'n amhosibl amcangyfrif pa mor eang yw effaith gadarnhaol eu cymorth i'r plant y buont yn gofalu amdanynt, a'r cenedlaethau o blant a ddilynodd wrth i'r plant hynny ddod yn oedolion eu hunain.

"Mae Alex yn haeddu cael ei gydnabod, a dathlu ei gyfraniad ef a chyfraniad ei ddiweddar wraig annwyl i Sir Benfro a'i phobl. Mae hon yn deyrnged deilwng i Dot, yn ogystal â symbol o'n diolch aruthrol a pharhaus am yr hyn mae'r ddau wedi ei gyfrannu i Sir Benfro dros eu blynyddoedd maith o wasanaeth."

Dywedodd Mr Allison fod maethu yn waith tîm a bod y stori yn yr enw gofalwr, "os nad ydych yn poeni, dydych chi ddim yn ei wneud," ychwanegodd.

Dywedodd ei fod yn falch o'r hyn yr oedd ef a'i wraig wedi ei gyflawni, ac o'r holl bobl ifanc sydd wedi bod yn rhan o'u bywydau.

"Ar ddiwedd y dydd, mae'n ymwneud â'r plant ac mae'n ymwneud â'u dyfodol," ychwanegodd.

Fel arwydd o werthfawrogiad, cyflwynwyd rhoddion i Alex, gan gynnwys planhigyn rhosyn o'r enw 'Super Dorothy'. Dywedodd Mr Mutter ei fod yn gobeithio y byddai'n "blodeuo" fel y plant y gofalodd Mr a Mrs Allison amdanynt.

Mae Mr Allison hefyd wedi hyrwyddo hawliau gofalwyr maeth, ac fel Cadeirydd Cymdeithas Gofalwyr Maeth Sir Benfro, mae'n gyswllt allweddol â thîm Cyngor Sir Penfro.

Cewch fwy o wybodaeth am ofal maeth a chymryd rhan yn Sir Benfro ar-lein neu drwy ffonio Maethu Cymru Sir Benfro ar 01437 774650.

Pennawyd: Yn y llun, mae Alex Allison gyda'i ferch Mel Wilmott, a hefyd (o'r chwith) yr Aelod Cabinet dros Wasanaethau Cymdeithasol, y Cynghorydd Tessa Hodgson, Cadeirydd y Cyngor, Pat Davies, Pennaeth Dros Dro’r Gwasanaethau Cymdeithasol, Darren Mutter, a'r Prif Weithredwr, Will Bramble.