Ewch i’ch llyfrgell leol yn ystod yr Wythnos Ddarllen Genedlaethol
Discover your local library this National Reading Week
Gwahoddir y cyhoedd yn Sir Benfro i fynd i’w llyfrgell leol yn ystod Wythnos Ddarllen Genedlaethol Llyfrgelloedd Cyhoeddus Cymru, a gynhelir o heddiw (dydd Llun) i ddydd Sadwrn 3 Hydref 2026.
Mae llyfrgelloedd cyhoeddus ledled Cymru yn dathlu'r rôl hanfodol sydd ganddynt wrth gefnogi darllen a darparu mannau croesawgar a hygyrch i bobl archwilio llyfrau, defnyddio cyfrifiaduron ac e-adnoddau, datblygu sgiliau a chysylltu â'u cymuned leol.
Maent yn ategu amrywiaeth o ddigwyddiadau a gynhaliwyd dros y misoedd diwethaf, a oedd yn cynnwys gweithgareddau Sialens Ddarllen yr Haf a sgyrsiau ar gyfer sawl dosbarth ysgol.
Mae'r amrywiaeth o ddigwyddiadau sy'n cael eu cynnal yn cynnwys sgyrsiau gan awduron, sesiynau amser rhigwm a digon o ddigwyddiadau cymunedol eraill, fel Gwau a Sgwrs, Clybiau Lego, Grwpiau Llyfrau a llawer mwy!
Mae'r digwyddiadau yn rhad ac am ddim ac wedi'u cynllunio i helpu i ysbrydoli pobl i ddarganfod llawenydd a manteision darllen ac i feithrin ymdeimlad o berthyn.
I wybod beth sy'n digwydd yn eich ardal chi, ewch i'r adran Digwyddiadau ar wefan Llyfrgelloedd Cymru (cliciwch ar y sir a'r mis) neu edrychwch ar y cyfryngau cymdeithasol lleol: https://llyfrgelloedd.cymru/digwyddiadau
Dywedodd yr Aelod Cabinet dros Wasanaethau Trigolion, y Cynghorydd Rhys Sinnett: "Mae'n wych bod Llyfrgelloedd Sir Benfro yn cymryd rhan ac yn tynnu sylw at y math o weithgareddau maen nhw'n eu cynnig drwy gydol y flwyddyn.
"Mae grwpiau sy'n cwrdd yn rheolaidd yn y llyfrgell yn helpu i annog pobl i ymweld dro ar ôl tro, sy'n achos dathlu. Ni ddylid tanamcangyfrif pwysigrwydd llyfrgelloedd wrth ysgogi llythrennedd ac annog darllen er pleser, ar gyfer pob oedran."
Mae’r Wythnos Ddarllen yn rhan o Flwyddyn Ddarllen Genedlaethol y DU 2026, sydd â’r nod o annog pobl o bob oed i ddatblygu cariad at ddarllen er pleser ac elwa o'r effaith gadarnhaol y gall ei chael ar eu haddysg, eu lles, eu creadigrwydd a'u dysgu gydol oes.
Anogir darllen o bob math – llyfrau, e-lyfrau, llyfrau sain, adrodd straeon a mwy.
Dewch o hyd i'ch llyfrgell leol yn Sir Benfro, ewch yno a mwynhewch: Am fanylion gweler: