Diweddariad am Union Hill

Yn gynharach eleni, cynhaliodd Cyngor Sir Penfro waith brys i gael gwared ar y rhan ansefydlog ac i wneud y wal sy'n weddill a'r arglawdd y tu ôl iddi yn ddiogel. Mae'r Cyngor yn monitro'r safle bob wythnos i sicrhau nad oes dirywiad pellach.

Y cam nesaf yw gwneud cais am gyllid cenedlaethol i gefnogi ailadeiladu'r wal a gwelliannau yn y cyffiniau, fel yr eglura'r Cynghorydd Rhys Sinnett.

"Mae cost ailosod y wal i'w chyflwr gwreiddiol yn sylweddol," dywedodd y Cynghorydd Sinnett, sef yr Aelod Cabinet dros Wasanaethau Preswylwyr.

"Ar hyn o bryd, mae'r ffordd gerbydau yn ardal y wal yn culhau yng nghyffiniau Priory Stile (i ryw bedwar metr), ac yn gorfodi cerddwyr i gamu i'r ffordd o amgylch y preswylfa. Ni fyddai disodli'r wal fel y mae ar hyn o bryd yn gwella'r sefyllfa hon.

"O ganlyniad, bydd y Cyngor yn gwneud cais am gyllid i gefnogi ailadeiladu'r wal a gwelliannau i'r briffordd ar gyfer cerddwyr a beicwyr.

"Er mwyn cydymffurfio â rheoliadau cyllido, mae angen i ni gasglu data, cynnal ymgynghoriad cyhoeddus a chwblhau gwaith arolygu manwl ar y safle.

"Bydd hyn yn cymryd amser, ac felly mae'n debygol na fydd y gwaith ailadeiladu arfaethedig ar y safle yn dechrau am flwyddyn ac felly bydd yn aros yn ei gyflwr presennol am y cyfnod hwnnw.

"Mae'n bwysig nodi bod y safle wedi'i wneud yn ddiogel, gan gynnwys lleoli ffensys Heras a rhwystrau diogelwch ar Stryd y Cei ac mae'r ardal yn cael ei monitro i gynnal cyfanrwydd yr arglawdd."

Dywedodd y Cynghorydd Sir dros ward Castell Hwlffordd, Tom Tudor: "Hoffwn estyn fy ngwerthfawrogiad i bawb sydd wedi bod yn delio â'r broblem hon, ac am sicrhau bod mesurau ar waith i amddiffyn diogelwch y cyhoedd.

"Hoffwn ddiolch hefyd i'r cyhoedd am eu hamynedd yn ystod y broses hon, ac os oes ganddynt unrhyw bryderon neu gwestiynau yn ystod y cyfnod ymgynghori a'r drafodaeth hon, mae croeso i chi gysylltu â mi."

I gael mwy o wybodaeth, cysylltwch â minorworksfund@pembrokeshire.gov.uk