Cŵn wedi'u cymryd ymaith ar ôl i'r perchennog anwybyddu gorchmynion i'w cadw dan reolaeth
Dogs removed after owner ignored orders to keep them under control
Mae llys wedi gorchymyn bod yn rhaid i gŵn menyw o Dre-fin gael eu cymryd oddi arni ar ôl iddi anwybyddu rhybuddion dro ar ôl tro i reoli ei hanifeiliaid anwes.
Gorfododd ynadon yn Hwlffordd Orchymyn Fforffedu ac Atafaelu ar gŵn Julia Goodgame ar ôl nifer o gwynion am sŵn gan y gymuned leol.
Roedd Goodgame, o Fryn y Derwydd, wedi pledio'n euog yn flaenorol i dorri Hysbysiad Gwarchod y Gymuned yn dilyn erlyniad gan Gyngor Sir Penfro.
Ymddangosodd gerbron Llys Ynadon Hwlffordd ddydd Iau 11 Rhagfyr i'w dedfrydu a'i rhoi o dan Orchymyn Ymddygiad Troseddol.
Rhoddodd y llys orchymyn Fforffedu ac Atafaelu ar y cŵn sy'n galluogi swyddogion i gymryd y cŵn o'r eiddo a'u rhoi mewn canolfan lles anifeiliaid gymeradwy i'w hailgartrefu.
Dywedwyd wrth ynadon fod Goodgame wedi cael Rhybudd Gwarchod y Gymuned yn dilyn cwynion ei bod hi wedi methu yn barhaus â rheoli ei chŵn, gan achosi ofn a phryder i eraill yn y gymuned.
Yn dilyn rhagr o gwynion i'r Cyngor, cofnodwyd tystiolaeth gan ddefnyddio The NoiseApp; a chafwyd lluniau, fideos a datganiadau ysgrifenedig gan dystion a oedd yn dangos nad oedd Goodgame yn rheoli'r cŵn o hyd.
O ganlyniad, cyflwynodd y Cyngor Hysbysiad Gwarchod y Gymuned.
Roedd hwn yn gorchymyn bod Goodgame yn rheoli cyfarth afresymol ei chŵn, cadw'r cŵn y tu mewn pan nad oedd gartref i leihau’r cyfarth uchel, cadw'r cŵn ar dennyn mewn mannau cyhoeddus, rheoli’r cŵn yn ddigonol tra yn yr eiddo a sicrhau bod unrhyw faw cŵn yn cael ei glirio a'i waredu'n briodol yn rheolaidd, a bod unrhyw finiau gwastraff cŵn i'w lleoli i ffwrdd o eiddo cyfagos.
Yn anffodus, parhaodd yr ymddygiad ac fe’i herlynwyd gan y Cyngor am dorri'r Hysbysiad Gwarchod y Gymuned, sy'n cael ei gyflwyno o dan delerau Deddf Ymddygiad Gwrthgymdeithasol, Troseddu a Phlismona 2014.
Roedd Goodgame wedi pledio'n euog i dorri'r Hysbysiad Gwarchod y Gymuned ym mis Tachwedd 2025.
Rhoddodd ynadon ddirwy o £1000 i Goodgame a gorchmynnodd iddi dalu Gordal Dioddefwr o £400 a £1,200 mewn ffioedd i Gyngor Sir Penfro.
Gorfododd ynadon y Gorchymyn Ymddygiad Troseddol a'r Gorchymyn Fforffedu ar gyfer y cŵn, ar Goodgame gyda'r nod o atal niwsans pellach i drigolion eraill.
Bydd unrhyw achos o dorri'r Gorchymyn Ymddygiad Troseddol yn cael ei gyfeirio yn ôl i'r Llys a all arwain at ddedfryd o garchar.
Dywedodd y Cynghorydd Jacob Williams, Aelod Cabinet dros Wasanaethau Rheoleiddio: "Mae'r Cyngor yn croesawu canlyniad yr achos llys hwn, a oedd yn benllanw gweithredu cydlynol rhwng adrannau gwarchod y cyhoedd a gwasanaethau tai y Cyngor a'r heddlu.
“Mae'n anffodus bod trigolion yr ardal wedi gorfod dioddef cyfnodau hir o anghyfleustra a gofid o ganlyniad i'r sefyllfa, a gobeithio y bydd y sefyllfa nawr wedi cael ei datrys.”
Bydd y sefyllfa yn parhau i gael ei monitro'n agos, a bydd trefniadau’n cael eu gwneud i sicrhau bod telerau'r Gorchmynion Fforffedu ac Ymddygiad Cymunedol yn cael eu dilyn.