Ysgol Gelliswick yn dathlu Adroddiad Arolygu Estyn cadarnhaol

Mae'r adroddiad yn amlygu ymroddiad ac ymrwymiad cymuned yr ysgol gyfan ac yn cydnabod y perthnasoedd cryf sy'n sail i ddysgu ar draws yr ysgol. Fe wnaeth yr arolygwyr gydnabod y dyheadau uchel a rennir gan staff, llywodraethwyr, rhieni a gofalwyr, a'r effaith gadarnhaol y mae'r rhain yn ei chael ar gynnydd a lles disgyblion.

Rhoddwyd canmoliaeth arbennig i waith yr ysgol wrth gefnogi pob dysgwr, gan gynnwys y rhai ag anghenion dysgu ychwanegol a disgyblion sy'n wynebu rhwystrau i ddysgu, gan sicrhau bod pob plentyn yn cael ei werthfawrogi ac yn cael y cyfle i lwyddo.

Roedd yr arolygiad hefyd yn cydnabod partneriaethau cryf yr ysgol â theuluoedd a'r gymuned ehangach. Mae'r perthnasoedd hyn yn helpu i greu amgylchedd cefnogol lle gall plant ffynnu yn academaidd ac yn bersonol.

Dywedodd Leanne Prevel, Pennaeth Ysgol Gelliswick: "Rydym wrth ein bodd gyda chanfyddiadau'r adroddiad ac yn hynod falch ei fod yn adlewyrchu'r diwylliant gofalgar, cynhwysol ac uchelgeisiol yr ydym yn gweithio'n galed i'w greu bob dydd yn Gelliswick.”

Ychwanegodd: "Mae'r arolygiad hwn yn cydnabod ymroddiad, ymrwymiad a gwaith caled pawb sy'n gysylltiedig â'n hysgol. Rydym yn arbennig o falch bod yr adroddiad yn tynnu sylw at ein hymrwymiad i gefnogi pob dysgwr, gan sicrhau bod pob plentyn yn teimlo eu bod yn cael eu gwerthfawrogi ac yn cael y cyfle i lwyddo.”

Wrth fyfyrio ar gyfraniad cymuned ehangach yr ysgol, ychwanegodd Mrs Prevel: "Hoffwn ddiolch i'n tîm staff ymroddedig, llywodraethwyr cefnogol, teuluoedd gwych ac, yn bwysicaf oll, ein disgyblion anhygoel. Mae eu brwdfrydedd, eu caredigrwydd, eu gwydnwch a'u balchder yn disgleirio bob dydd ac yn cael eu hadlewyrchu trwy gydol yr adroddiad hwn.”

Mae'r adroddiad hefyd yn adlewyrchu ymrwymiad Ysgol Gelliswick i roi plant a theuluoedd wrth wraidd ei gwaith, gan feithrin diwylliant lle mae pawb yn cael eu gwerthfawrogi a lle mae disgyblion yn cael eu hannog i fod â dyheadau uchel ar gyfer eu dyfodol.

Wrth edrych ymlaen, mae'r ysgol wedi addo adeiladu ar ei llwyddiannau wrth gofleidio'r argymhellion a amlinellir yn yr adroddiad.

“Mae'r adroddiad hwn yn ddathliad o'r hyn yr ydym wedi'i gyflawni gyda'n gilydd a'r gwahaniaeth cadarnhaol rydyn ni'n ei wneud ym mywydau plant bob dydd. Byddwn yn parhau i adeiladu ar ein cryfderau lawer ac yn bwrw ymlaen ag argymhellion Estyn fel y gall pob plentyn ffynnu a chyflawni ei orau," meddai Mrs Prevel.

Dywedodd y Cynghorydd Paul Miller, Aelod Cabinet Cyngor Sir Penfro dros Addysg: "Rwy'n falch iawn o weld Ysgol WRh yr Eglwys yng Nghymru Gelliswick yn cael ei chydnabod mor gadarnhaol yn ei hadroddiad arolwg Estyn diweddaraf.

“Mae'r adroddiad yn adlewyrchu ymroddiad arweinyddiaeth, staff, llywodraethwyr, rhieni a gofalwyr yr ysgol wrth greu amgylchedd gofalgar, cynhwysol ac uchelgeisiol lle mae pob dysgwr yn cael ei gefnogi i gyflawni eu potensial.

“Yn bwysicaf oll, mae'n tynnu sylw at frwdfrydedd, gwydnwch a chyflawniadau'r disgyblion eu hunain. Mae hyn yn ganlyniad y dylai cymuned yr ysgol gyfan fod yn falch ohono."

Gallwch ddod o hyd i'r adroddiad yn https://www.estyn.llyw.cymru/adroddiadau-arolygu-diweddaraf/