Cefnogaeth hael wedi cytuno ar gyfer Llyfrgell Aberdaugleddau

Yn ei gyfarfod ar 12 Ionawr, cytunodd Cyngor Tref Aberdaugleddau ar gyllid o £18,700 i gefnogi Llyfrgell Aberdaugleddau dros dair blynedd.

Mae'r penderfyniad yn dilyn blwyddyn o weithio mewn partneriaeth rhwng Cyngor Sir Penfro, Porthladd Aberdaugleddau a Chyngor Tref Aberdaugleddau i ddod o hyd i atebion i bwysau cyllido ar y llyfrgell.

Gwnaeth ymgynghoriad cyhoeddus yn 2025 dynnu sylw at bwysigrwydd y llyfrgell fel ased cymunedol.

Arweiniodd y trafodaethau at gyfraniad hael o £10,000 gan Borthladd Aberdaugleddau a £3,000 gan Gyngor y Dref i sicrhau bod y llyfrgell yn parhau i weithredu ym mlwyddyn ariannol 2025/26.

Bydd y cyllid diweddaraf yn cefnogi gweithredu’r llyfrgell am y tair blynedd nesaf, a bydd yn eistedd ochr yn ochr â chefnogaeth ariannol sylweddol barhaus gan Borthladd Aberdaugleddau dros oes prydles y Cyngor.   

Dywedodd y Cynghorydd Rhys Sinnett, Aelod Cabinet Cyngor Sir Penfro dros Wasanaethau Trigolion: "Mae hyn yn newyddion ardderchog i'r dref gan y bydd yn caniatáu inni yng Nghyngor Sir Penfro barhau i ddarparu gwasanaeth gwerthfawr ar y lefelau presennol.

“Rydym yn hynod ddiolchgar am gefnogaeth Cyngor Tref Aberdaugleddau a Phorthladd Aberdaugleddau, oherwydd trwy weithio mewn partneriaeth rydym yn gallu cynnal yr adnodd cymunedol pwysig hwn.”

Dywedodd y Cynghorydd William Elliott, Maer Aberdaugleddau: "Rydym wrth ein bodd ein bod wedi dod i gytundeb i gefnogi'r llyfrgell ar gyfer y gymuned dros y tair blynedd nesaf. 

“Rydym yn gwerthfawrogi pwysigrwydd y llyfrgell, nid yn unig ar gyfer benthyg llyfrau ond hefyd ar gyfer cael ei defnyddio gan grwpiau, gwiriadau lles, mannau cynnes a mwy. 

“Dros y 12 mis diwethaf, rydym wedi parhau i weithio gyda tîm y llyfrgell, y Cyngor Sir a Phorthladd Aberdaugleddau i archwilio'r holl opsiynau sydd ar gael ac rydym wedi ymrwymo i barhau â'r bartneriaeth bwysig hon wrth symud ymlaen hefyd.”

Dywedodd Tom Sawyer, Prif Weithredwr Porthladd Aberdaugleddau: "Mae llyfrgelloedd yn gonglfeini ein cymunedau - lle mae pobl yn cysylltu, yn dysgu ac yn teimlo eu bod yn cael eu cefnogi.

“Rydym yn falch o fod wedi helpu i sicrhau bod yr adnodd hanfodol hwn yn parhau i fod yn hygyrch i bawb sy'n dibynnu arno."

Mae Llyfrgell Aberdaugleddau wedi'i lleoli yn Cedar Court.

Gallwch ddod o hyd i ragor o wybodaeth am y llyfrgell a'r cyfleusterau yn: https://www.sir-benfro.gov.uk/llyfrgelloedd-sir-benfro/llyfrgell-a-chanolfan-wybodaeth-aberdaugleddau