Llongyfarchiadau i'r holl ddysgwyr ar ddiwrnod canlyniadau Safon Uwch a chymwysterau galwedigaethol!

Mae Cyngor Sir Penfro yn estyn llongyfarchiadau twymgalon i'r holl ddysgwyr am eu hymroddiad, eu dyfalbarhad a'u gwaith caled. Mae eu cyflawniadau yn adlewyrchu eu hymrwymiad a'u gwytnwch, a heddiw rydym yn dathlu pob dysgwr.

Mae'r Cyngor hefyd yn cydnabod y gefnogaeth hanfodol a ddarperir gan deuluoedd, athrawon a staff ysgolion. Mae eich anogaeth a'ch arweiniad wedi chwarae rhan hanfodol wrth helpu dysgwyr i gyrraedd y garreg filltir hon.

I bob dysgwr - p'un a yw'ch canlyniadau yn cyd-fynd â'ch disgwyliadau neu yn dod â heriau annisgwyl - cofiwch mai dim ond un bennod yn eich taith yw hon. Mae llawer o lwybrau i lwyddiant, ac mae canlyniadau heddiw yn ddechrau posibiliadau newydd cyffrous.

Dywedodd yr Aelod Cabinet dros Addysg a'r Gymraeg, y Cynghorydd Guy Woodham: "Rydym yn llongyfarch yr holl ddysgwyr ar eu cyflawniadau. Mae cyflawniadau ein pobl ifanc i'w canmol a'u dathlu. Dymunaf bob llwyddiant iddynt yn eu hymdrechion yn y dyfodol.

“Rydym yn annog dysgwyr i ymfalchïo yn eu cyflawniadau a chofleidio'r cyfleoedd sydd o'u blaenau. I'r rhai sy'n ceisio cymorth neu arweiniad pellach, bydd adnoddau ar gael trwy eich ysgol i'ch helpu i gynllunio'ch camau nesaf."

Unwaith eto, llongyfarchiadau i'r holl ddysgwyr a'u teuluoedd. Mae'r Cyngor yn hynod falch o'ch cyflawniadau ac yn dymuno llwyddiant parhaus i chi ym mhopeth sydd o'ch blaenau.

Mae cymorth iechyd meddwl am ddim ar gael i fyfyrwyr drwy SilverCloud GIG Cymru, sy'n cynnig rhaglenni ar-lein hyblyg, sy'n seiliedig ar dystiolaeth i helpu pobl ifanc i reoli straen, gorbryder a hwyliau isel. Gall myfyrwyr gofrestru yma.