Ysgolion newydd ac amseroedd cyffrous o'n blaenau ar gyfer Prosiect Sbardun
New schools and exciting times ahead for Springboard Project
Gyda chyllid newydd o’r Gronfa Ffyniant Gyffredin wedi'i sicrhau gan Lywodraeth y DU, mae'r prosiect Sbarduno, Dysgu Sir Benfro wedi gallu ymestyn ei gyrhaeddiad i ysgolion newydd a dyblu'r gefnogaeth mae'n ei gynnig i'w bartneriaid ysgol sydd eisoes wedi'u sefydlu.
Gall Sbardun nawr gynnig cymorth i ysgolion a phosibiliadau hyfforddi i aelodau o'r teulu sy’n oedolion i ategu'r cyfleoedd Dysgu i Deuluoedd mae'r prosiect wedi canolbwyntio arnyn nhw yn ystod y blynyddoedd diwethaf.
I ddathlu Wythnos Addysg Oedolion cynhaliodd Sbardun dair Ffair o weithgareddau teuluol rhad ac am ddim yn Ysgol Gynradd Gymunedol Aberdaugleddau, Ysgol Gynradd Waldo Williams ac Ysgol Glannau Gwaun.
Fe wnaeth llawer o deuluoedd fynychu bob digwyddiad. Aeth teuluoedd â phlant o'r dosbarth meithrin hyd at Flwyddyn 6, i gyd yn newydd i Sbardun, i'r gweithgareddau gyda brwdfrydedd gwirioneddol.
Roedd crochenwaith, addurno cacennau, gwneud marciau, crefft llwy stori a choedwriaeth ymhlith y nifer o weithgareddau am ddim oedd ar gael.
Mae gweithgareddau Sbardun a gynlluniwyd ar gyfer mis Hydref yn Ysgol Waldo Williams ac Ysgol Glannau Gwaun bellach wedi'u trefnu'n llawn diolch i'r diddordeb a gynhyrchwyd gan y Ffeiriau.
Mae'r Ffeiriau yn nodi lansiad gweithgareddau am ddim i deuluoedd yn Ysgol Waldo Williams ac Ysgol Glannau Gwaun — ysgolion y mae Laura Phillips, y Cydlynydd Sbardun, yn falch iawn o allu gweithio gyda nhw.
Dywedodd Laura: “Mae gan Addysg Deuluol Sbardun y pŵer i ymgysylltu, ennyn brwdfrydedd, ysbrydoli a chefnogi teuluoedd i archwilio sgiliau a diddordebau newydd a all gael effaith newid bywyd i bawb sy'n cymryd rhan.
“Mae gallu cynnig y cyfleoedd hyn i fwy o ysgolion ledled Sir Benfro nag erioed o'r blaen yn rhywbeth yr ydym ni ond wedi gallu ei wneud diolch i'r grant Ffyniant Bro hyd yma”.
Nesaf i elwa o'r grant hwn fydd Ysgol Penrhyn Dewi a Prendergast.
Dywedodd Debbie Bond, Pennaeth Ysgol Waldo Williams: “Mae teuluoedd Ysgol Waldo Williams mor gyffrous i gael y cyfle hwn i ddysgu sgiliau newydd gyda'u plant.
“Rydyn ni'n teimlo mor lwcus i gael Sbardun i ymgysylltu â'n teuluoedd a'u cefnogi. Mae amseroedd cyffrous o'n blaen!”
Dywedodd Mari Jones, Pennaeth Glannau Gwaun “Rydym ni’n teimlo’n freintiedig i gael y cyfle i groesawu'r prosiect sbardun i Ysgol Glannau Gwaun.
“Mae ein disgyblion a'n rhieni eisoes wedi profi'r cyfleoedd cyffrous a diddorol sydd ar gael iddynt drwy brynhawn lansio hynod lwyddiannus.
“Mae'r disgyblion yn siarad gyda brwdfrydedd am yr wythnosau nesaf ac fel ysgol rydym ni’n gwybod y bydd y prosiect hwn yn hynod fuddiol i'n disgyblion a'u teuluoedd”.
Mae llawer mwy o wybodaeth am Sbardun ar gael ar dudalen Facebook y Prosiect.