Ysgol Gymunedol Doc Penfro yn dathlu arolygiad llwyddiannus gan Estyn wrth i'r Pennaeth, a wasanaethodd yn hir, ymddeol

Mae'r adroddiad yn tynnu sylw at ymrwymiad yr ysgol i Hawliau Plant ac ymrwymiad cryf a pharhaus i gydraddoldeb, sy'n lleihau rhwystrau i ddysgu ac wedi helpu i leihau bylchau mewn cyflawniad.

Mae'r adroddiad arolygu yn canmol arweinyddiaeth benderfynol a gweledigaethol y Pennaeth Michele Thomas, a nodweddir gan ddisgwyliadau uchel ar gyfer dysgu a lles disgyblion, safonau ysgrifennu rhagorol, a'i amgylchedd meithrin a chynhwysol.

Roedd hon yn deyrnged briodol i waith caled y tîm staff ac arweinyddiaeth ymroddedig Mrs Thomas sy'n ymddeol ar ôl dros 15 mlynedd o wasanaeth i'r ysgol.

Mae adroddiad arolygu Estyn yn nodi bod yr ysgol yn gymuned ddysgu ysbrydoledig a chroesawgar.

Yn ei chraidd mae ethos cryf sy'n parchu hawliau, sy'n hybu tegwch ac ymdeimlad o berthyn. Mae ymrwymiad nodedig yr ysgol i degwch yn sicrhau bod staff yn dathlu'r cefndiroedd amrywiol ac yn cwrdd ag anghenion disgyblion.

Mae disgyblion yn dangos empathi ac yn trin eraill gyda pharch. Mae arweinwyr yn hybu gweledigaeth glir ar y cyd sy'n uno staff, disgyblion, rhieni a'r gymuned ehangach. 

Mae'r ysgol yn creu partneriaethau gwerthfawr gyda'i chymuned i wella a chyfoethogi dysgu a lles disgyblion.

Fel ysgol arweiniol ar gyfer Addysg Gychwynnol i Athrawon, mae arweinwyr yn cyfrannu'n sylweddol at ddatblygu athrawon newydd sy’n cryfhau diwylliant dysgu myfyriol a phroffesiynol yr ysgol.

Mae'r ysgol wedi ymgorffori cwricwlwm ysbrydoledig sy'n adlewyrchu diddordebau disgyblion a'r ardal yn effeithiol.

Mae pwyslais ar ddatblygiad proffesiynol i staff i gryfhau dulliau o addysgu ysgrifennu wedi sicrhau bod prosesau cyson ac effeithiol ar waith. Mae'r rhan fwyaf o ddisgyblion yn ysgrifennu'n dda ac mae sgiliau ysgrifennu disgyblion hŷn yn rhagorol.

Maent yn ysgrifennu yn ddychmygus ac yn greadigol i ennyn diddordeb y darllenydd a chymhwyso eu sgiliau yn bwrpasol gan ddefnyddio geirfa dechnegol yn eu gwaith ar draws y cwricwlwm.

Dim ond un argymhelliad gan Estyn a gafodd yr ysgol, sef mynd i'r afael â'r lefelau uchel o absenoldeb parhaus. Yn ysgolion Cymru, diffinnir absenoldeb parhaus fel disgybl sy'n colli 10% neu fwy o'u sesiynau ysgol angenrheidiol.

Cafodd y corff llywodraethu eu cydnabod am fod yn brofiadol iawn ac am adnabod yr ysgol a'i chymuned yn dda.

Dywedodd Cadeirydd y Llywodraethwyr, Phil Bowen: "Rydym yn hynod ddiolchgar i Mrs Thomas am ei hymroddiad diwyro dros y blynyddoedd. Mae adroddiad diweddar Estyn yn dyst i'r arweinyddiaeth a'r diwylliant y mae hi wedi'i feithrin.

“Mae hi'n gadael gwaddol o gyflawniad, gofal a gwytnwch a fydd yn parhau i lunio'r ysgol am flynyddoedd i ddod. Rwy'n llongyfarch cymuned yr ysgol gyfan ar yr adroddiad arolwg ardderchog hwn."

Dywedodd y Cynghorydd Jon Harvey, Arweinydd Cyngor Sir Penfro ac aelod o Gorff Llywodraethu'r ysgol: "Rwy'n hynod falch o ddarllen yr adroddiad hwn am waith rhagorol Ysgol Gymunedol Doc Penfro.

“Nid yw adroddiad o'r math hwn yn dod ar ddamwain. Mae'n dyst i ymdrechion disgyblion a staff, gyda chefnogaeth y Corff Llywodraethu a rhieni a gofalwyr.

“Mae arweinyddiaeth gref ac ymroddedig y Pennaeth wedi cyfrannu'n sylweddol at ganlyniad yr arolwg a byddwn nawr yn gweithio'n agos gyda'r Pennaeth newydd i sicrhau bod y dyfodol yn parhau i fod yn ddisglair i Ysgol Gymunedol Doc Penfro.”

Dywedodd y Pennaeth, Mrs Thomas: "Mae wedi bod yn fraint ac yn anrhydedd arwain Ysgol Gymunedol Doc Penfro. Rwy'n hynod falch o'r hyn yr ydym wedi'i gyflawni gyda'n gilydd ac yn gwybod bod yr ysgol mewn sefyllfa gref i barhau â'i thaith o lwyddiant.

"Hoffwn ddiolch i'r disgyblion, staff, llywodraethwyr a rhieni am eu cefnogaeth a'u hymrwymiad dros y blynyddoedd. Dymunaf bob llwyddiant i Mrs Crockford Morris fel y pennaeth sydd newydd ei phenodi o fis Medi."