Pobl ifanc yn arwain y ffordd wrth greu newid parhaol ledled Sir Benfro
Young people lead the way in creating lasting change across Pembrokeshire
Mae prosiect dan arweiniad pobl ifanc a ddechreuodd fel grŵp trafod bach i ferched yn Ysgol Greenhill wedi tyfu i fod yn fudiad arobryn ledled Sir Benfro a thu hwnt.
Gyda chefnogaeth Gwasanaeth Ieuenctid Sir Benfro a'r Uwch Weithiwr Ieuenctid Leah Walker, mae Rydyn Ni yn Ymwybodol am ein Taith, wedi treulio'r pedair blynedd diwethaf yn grymuso pobl ifanc i ddod yn arweinwyr, addysgwyr ac eiriolwyr dros newid cadarnhaol.
Dros y pedair blynedd diwethaf, mae Rydyn Ni yn Ymwybodol am ein Taith wedi tyfu i fod yn fenter a arweinir gan bobl ifanc ledled y sir sy'n dod â merched a bechgyn ynghyd i hyrwyddo perthnasoedd iach, gwrywdod cadarnhaol, ymwybyddiaeth o iechyd meddwl ac atal trais yn erbyn menywod a merched.
Mae pobl ifanc wedi arwain gweithdai, datblygu adnoddau, codi mwy na £3,000 ar gyfer elusennau lleol, cynrychioli Sir Benfro mewn digwyddiadau cenedlaethol a rhyngwladol, a gweithio gydag amrywiaeth o bartneriaid i greu newid parhaol.
Drwy'r prosiect hwn maent wedi sefydlu perthynas waith gref gyda sefydliadau anhygoel yng Nghymru, un ohonynt yw Ymgyrch Iawn Llywodraeth Cymru a chwmni buddiant cymunedol newydd, Our Voice Our Journey, a grëwyd ar ôl taith gyfnewid y fenter Taith i Seland Newydd gyda'r prosiect hwn ac Ei Llais (Bro Morgannwg).
Maen nhw hefyd wedi gweithio gyda'r mudiad byd-eang She Is Not Your Rehab y maen nhw'n gobeithio ei groesawu yn ôl i Sir Benfro eto ym mis Medi.
Mae eu cyflawniadau wedi cynnwys helpu i ddatblygu Pecyn Cymorth Aflonyddu Rhywiol dwyieithog gydag Ei Llais (prosiect ieuenctid Bro Morgannwg) i'w ddefnyddio ledled Cymru, lansio ymgyrchoedd gwrywdod cadarnhaol a chyflwyno prosiectau lles emosiynol sydd wedi cyrraedd ysgolion a chymunedau ledled y sir.
Mae eu gwaith hefyd wedi cael ei gydnabod gyda Gwobr Cymru Ddiogelach Canmoliaeth Uchel a Gwobr Sbotolau Sir Benfro.
Yn gynharach eleni gwahoddwyd Leah i Balas St James ar gyfer digwyddiad arbennig i ddathlu gweithwyr Llywodraeth Leol a'u gwaith ym maes trais yn erbyn menywod a merched, cam-drin domestig a thrais rhywiol.
"Mae'r hyn a ddechreuodd fel grŵp bach o bobl ifanc benderfynol wedi dod yn enghraifft bwerus o'r hyn y gellir ei gyflawni pan rhoddir ffydd mewn pobl ifanc i arwain. Wrth i Rydyn Ni yn Ymwybodol am ein Taith barhau i dyfu, mae ei genhadaeth yn parhau i fod yn glir: addysgu, grymuso ac ysbrydoli newid parhaol.
"Rwy'n hynod falch o'n pobl ifanc a'r hyn maen nhw wedi'i gyflawni," meddai Leah.
