Ysgol Prendergast yn ennill Gwobr Aur am gefnogaeth i’r Lluoedd Arfog

Dyfarnwyd statws Aur Ysgol Gyfeillgar i’r Lluoedd Arfog Cymru i Ysgol Gynradd Gymunedol Prendergast, sef yr anrhydedd uchaf posibl.

Dywedodd Louise John, Pennaeth Ysgol Gynradd Gymunedol Prendergast, fod y staff wedi ymrwymo i sicrhau bod “disgyblion y Lluoedd Arfog yn teimlo eu bod yn cael croeso, yn cael eu deall, a’u bod yn gallu ffynnu.”

Ychwanegodd Ms John: “Rydym wedi ymrwymo i gydnabod a chefnogi profiadau unigryw disgyblion o deuluoedd y Lluoedd Arfog.

“Gwnaethon ni gais am statws Aur Ysgol Gyfeillgar i’r Lluoedd Arfog Cymru gyda Cefnogi Plant y Lluoedd Arfog mewn Addysg Cymru (SSCE Cymru) i adlewyrchu’r gwaith parhaus rydyn ni wedi’i wneud i ymgorffori dealltwriaeth o fywyd y Lluoedd Arfog ar draws ein hysgol.

“Rydyn ni wedi datblygu dull ysgol gyfan sy’n blaenoriaethu adnabod cynnar, cyfathrebu cryf â theuluoedd, a chymorth bugeiliol.

“Bydd cyflawni statws Aur yn cydnabod ymrwymiad ein staff a’r arferion cynhwysol sydd eisoes ar waith, gan atgyfnerthu ein hymroddiad parhaus i gynnal lles, ymdeimlad o berthyn, a llwyddiant addysgol plant y Lluoedd Arfog.”

Er mwyn cyflawni statws Aur Ysgol Gyfeillgar i’r Lluoedd Arfog Cymru, bu’n rhaid i’r ysgol ddangos tystiolaeth o arfer da wrth gefnogi plant y Lluoedd Arfog, gan greu amgylchedd cadarnhaol i blant y Lluoedd Arfog rannu eu profiadau ac annog ymgysylltiad â chymuned y Lluoedd Arfog.

Roedd yr ysgol wedi ennill y gwobrau Efydd ac Arian yn flaenorol cyn sicrhau’r wobr Aur.

Dywedodd y Cynghorydd Simon Hancock, Hyrwyddwr Aelodau Cyngor Sir Penfro dros y Lluoedd Arfog: “Hoffwn longyfarch Ysgol Prendergast am ennill statws Aur Ysgol Gyfeillgar y Lluoedd Arfog Cymru, sy’n rhywbeth a chwenychir yn fawr.

“Fel rydw i wedi’i weld yn fy ymweliadau, mae’r ysgol yn ymgysylltu’n wirioneddol â chymuned y Lluoedd Arfog ac yn creu amgylchedd cadarnhaol a chefnogol i blant y Lluoedd Arfog.”

Ychwanegodd y Cynghorydd Guy Woodham, yr Aelod Cabinet dros Addysg a’r Gymraeg: “Mae hwn yn gydnabyddiaeth wych o’r gwaith campus parhaus sy’n cael ei wneud yn Ysgol Prendergast i gefnogi disgyblion a theuluoedd o’r Lluoedd Arfog, ac mae’n enghraifft wych o arfer da o ran sut i ymgymryd â’r gefnogaeth bwysig hon. Da iawn i bawb a fu’n rhan o’r gwaith.”