Annog pobl ifanc i roi cynnig ar gampau newydd

Cynhaliwyd digwyddiadau cymunedol aml-chwaraeon ADY Chwaraeon Sir Benfro dros ddau ddiwrnod ym mis Mehefin, gydag amrywiaeth o glybiau a sefydliadau lleol yn darparu sesiynau blasu fel cyflwyniadau i'w campau.

Cynhaliwyd un digwyddiad yn ne y Sir yng Nghanolfan Hamdden Penfro ddydd Mawrth, 24 Mehefin, ac un yn y gogledd yng Nghanolfan Hamdden Abergwaun, dau ddiwrnod yn ddiweddarach.

Daeth llawer o bobl ifanc i’r ddau leoliad gydag Ysgol Gynradd Dinbych-y-pysgod, Monkton a Portfield yn mwynhau'r campau a gynigwyd yn y digwyddiad yn y de ac ysgolion Glannau Gwaun, Waldo Williams, Penrhyn Dewi a Johnston yn mynd i Ganolfan Hamdden Abergwaun.

Fe wnaeth cyfanswm o 62 o ddisgyblion roi cynnig ar amrywiaeth o chwaraeon a gweithgareddau a ddarparwyd gan glwb pêl-droed Clarbeston Warriors, Dawns Gofal Celf, Hoci Abergwaun ag Wdig, y Scarlets, Super 1s Disability a Chlwb Criced Hwlffordd.

Dywedodd Elgan Vittle, o Chwaraeon Sir Benfro: "Nod y digwyddiadau yw rhoi hwb i hyder, rhyngweithio cymdeithasol a lles corfforol, wrth annog cyfranogwyr i archwilio gweithgareddau newydd mewn amgylchedd diogel a chroesawgar.

“Trwy weithio'n agos gydag ysgolion a phartneriaid cymunedol, ein nod yw sicrhau bod pob person ifanc - waeth beth fo'i allu – yn gallu rhoi cynnig ar brofiadau chwaraeon cadarnhaol, ystyrlon sy'n dathlu cyfranogiad, ymdrech a hwyl.

“Roedd yr adborth yn wych gan yr holl ysgolion a chafodd y disgyblion, a’r staff, amser gwych ac rydym yn gobeithio y bydd cryn dipyn o bobl ifanc nawr yn ymuno â rhai clybiau lleol o ganlyniad uniongyrchol i'r digwyddiad hwn.”

Diolch i noddwr y digwyddiad, Valero, a Llysgenhadon Ifanc o Ysgol Harri Tudur ac Ysgol Bro Gwaun a gynorthwyodd y digwyddiadau.