Prosiect Menter a Sgiliau yn dod i ben ar ôl chwe mis llwyddiannus

Goruchwyliwyd y Prosiect Menter a Sgiliau (ESP) gan Gyngor Sir Penfro a chafodd ei ariannu gan Lywodraeth y DU drwy Gronfa Adnewyddu Cymunedol y DU.

Roedd hwn yn brosiect deinamig gyda chwmpas heriol ac ystod o ganlyniadau ar draws gwahanol ddarparwyr hyfforddiant a sefydliadau cymorth busnes.

Roedd amserlen gyfyngedig a nodau uchelgeisiol y prosiect yn golygu bod cyflawniadau unigolion, busnesau ac astudiaethau lleol hyd yn oed yn fwy arwyddocaol.

Mae'r prosiect hefyd wedi sefydlu seilwaith mewn sefydliadau i ddefnyddio ffrydiau ariannu newydd fel Y Gronfa Ffyniant Gyffredin (SPF) Llywodraeth y DU pan fydd ar gael.

Roedd buddiolwyr y cynllun ESP yn cael eu cysylltu ag un o wyth Partner Cyflawni ar gyfer y peilot i dargedu gweithgarwch economaidd ar draws Sir Benfro.

Roedd hyn yn cynnwys cyngor a chymorth busnes ar ôl Covid-19, cynlluniau dad-garboneiddio busnes, cymorth i greu busnesau newydd, cymorth i unigolion uwchsgilio a chael mynediad at hyfforddiant a chymorth i bobl economaidd anweithgar.

Lansiwyd y prosiect ym mis Mehefin 2022 a daeth y prosiect i ben ym mis Rhagfyr 2022 gyda rhai cyflawniadau nodedig.

Ymhlith y canlyniadau llwyddiannus roedd 292 o bobl yn ennill cymhwyster, 38 o swyddi wedi'u gwarchod yn ddiogel, naw busnes newydd a datblygwyd 20 o gynlluniau datgarboneiddio.

Arweiniodd Cynllun Hyfforddi â Chymhorthdal Cyflog at 10 o bobl yn derbyn cynigion cyflogaeth o ganlyniad uniongyrchol i leoliadau.

O ran ymchwil, cynhaliwyd arolwg baromedr sgiliau lleol i gynorthwyo darpariaeth sgiliau yn y dyfodol ar gyfer ein Sir a chrëwyd Cynllun Seilwaith Gwyrdd Trefi 2022.

Roedd hyblygrwydd rhaglen y prosiect hefyd yn caniatáu i adnoddau presennol gael eu defnyddio i gynorthwyo pobl Wcráin sy'n ymgartrefu yn Sir Benfro, gan gynorthwyo eu hintegreiddio i'r gymuned leol.

Roedd adborth gan y rhai a gymerodd ran yn y prosiect yn gadarnhaol.

Dywedodd un cyfranogwr: “Rwy'n ddiolchgar am drefnu'r hyfforddiant, y cymorth a'r gefnogaeth ar bob cam.

“Roedd yn brofiad defnyddiol a roddodd hyder i mi, dysgodd eirfa broffesiynol i mi, a rhoi cyfle i mi ddringo i lefel arall o dwf proffesiynol. Diolch i chi.”

Ychwanegodd un arall: “Drwy gwblhau fy lleoliad ochr yn ochr â'm gwaith cwrs, cefais gipolwg ar y maes addysgol. Fe wnaeth fy helpu i ddatblygu fy hyder a sgiliau newydd wrth i mi weithio fy ffordd drwy'r cwrs a oedd hyd yn oed yn fwy buddiol.”

Dywedodd Rachel Moxey, Pennaeth Datblygu Economaidd ac Adfywio Cyngor Sir Penfro: “Roeddem wrth ein bodd gyda llwyddiannau'r prosiect a gyda'n partneriaid yn y cyfnod amser cyfyngedig.

“Darparodd y Prosiect fuddsoddiad mewn pobl, cymunedau a busnesau a chynorthwyodd lawer o'r rhai dan anfantais ar lefel leol. Mae'r prosiect peilot hwn bellach wedi cau ond bydd y gwersi a'r llwybrau hefyd yn ein helpu i ddatblygu mentrau yn y dyfodol a fydd yn cynorthwyo trigolion Sir Benfro ymhellach drwy lwybrau fel Cronfa Ffyniant Gyffredin newydd y DU.” 

Dywedodd y Cynghorydd Paul Miller, Dirprwy Arweinydd y Cyngor ac Aelod Cabinet dros Le, y Rhanbarth a Newid Hinsawdd: “Roedd Sir Benfro'n ffodus o fod wedi derbyn dyfarniad sylweddol gan gronfa UKCRF ar gyfer y prosiect Menter a Sgiliau a nawr bod y prosiect wedi dod i ben, mae gwaith caled y tîm a'r partneriaid wedi galluogi pobl leol i gael mynediad i gyfleoedd hyfforddi newydd, cefnogi busnesau lleol, a hwyluso creu swyddi newydd.”

Cyflwynwyd yr ESP ochr yn ochr â phartneriaid allweddol Busnes mewn Ffocws, Cwmpas (Canolfan Cydweithredol Cymru gynt), Providence Training, Futureworks, Gwasanaeth Ieuenctid Sir Benfro, Milford Youth Matters, Ynni, Peirianneg a Thwristiaeth Coleg Sir Benfro; Cynllun Seilwaith Gwyrdd 2022 gan Land Use Consultants Ltd, Skills Barometer gan Oakbank Ltd a Chynllun Hyfforddi â Chymhorthdal Cyflog y Cyngor.

Ariennir y prosiect hwn gan Lywodraeth y DU drwy Gronfa Adnewyddu Cymunedol y DU.