Annog y cyhoedd i roi eu barn ar ddyfodol gwastraff ac ailgylchu yn Sir Benfro

Gwahoddir aelodau'r cyhoedd i roi adborth ar Strategaeth Gwasanaethau Amgylcheddol Drafft 2025-2030.

Dros yr 20 mlynedd diwethaf mae Cyngor Sir Penfro wedi llwyddo i gyflwyno nifer o newidiadau sydd wedi gosod yr Awdurdod yn rheolaidd ymhlith y cynghorau sy'n perfformio orau yng Nghymru ym maes ailgylchu.

Fodd bynnag, mae mwy i'w wneud a chanfu dadansoddiad manwl o wastraff cartref a wnaed yn 2022 y gellid ailgylchu 48% o'r deunyddiau sy’n cael ei roi mewn bagiau du yn Sir Benfro.

Mae'r strategaeth yn amlinellu cynigion ynghylch gwelliannau i ailgylchu gan gynnwys cyflwyno ailgylchu ychwanegol wrth ymyl y ffordd a newidiadau i gasgliadau gwastraff gweddilliol (bagiau duon).

Dywedodd y Cynghorydd Rhys Sinnett, Aelod Cabinet Cyngor Sir Penfro dros Wasanaethau Trigolion: "Nod y strategaeth yw adolygu'r opsiynau gorau sydd ar gael i Sir Benfro i gyflawni ei dyheadau amgylcheddol o leihau gwastraff ac annog ailgylchu, ailddefnyddio ac atgyweirio, a gwella’r amgylchedd lleol.

“Mae ystyried eich barn yn rhan hanfodol o broses gwneud penderfyniadau'r Cyngor ac mae'r Cyngor yn agored i syniadau y gallai fod gan gartrefi a busnesau i helpu i gyflawni'r Strategaeth Gwasanaethau Amgylcheddol.”

Mae'r strategaeth yn canolbwyntio ar gyflawni pedair blaenoriaeth allweddol:

1. Gwella atal ac ailddefnyddio ein hadnoddau.

• Lleihau gwastraff cyffredinol a gynhyrchir fesul cartref.
• Gwella opsiynau ailddefnyddio drwy Ganolfannau Gwastraff ac Ailgylchu.

2. Adeiladu ar ein perfformiad ailgylchu yn unol â'r economi gylchol a Sero Net

• Parhau i fodloni targedau ailgylchu statudol.
• Ehangu gwasanaeth ailgylchu ymyl y ffordd i'w gwneud yn haws ailgylchu mwy o ddeunyddiau gartref, cynyddu ailgylchu, a hybu cadw deunyddiau mewn cylchrediad.
• Lleihau gwastraff gweddilliol, drwy adolygu amlder a chapasiti casgliadau gweddilliol (gan gynnwys casgliad pob pedair wythnos), i gynyddu incwm ailgylchu a lleihau costau gwaredu.

3. Gwella cynaliadwyedd ein strydoedd, traethau a mannau gwyrdd

• Darparu atebion cynaliadwy a chost-effeithiol i gynnal a gwella’r amgylchedd lleol, ansawdd tir y cyhoedd a'i gyfleusterau.
• Gwelliannau mewn cydnerthedd ecolegol trwy brosiectau sy'n ymwneud â chadwraeth bioamrywiaeth, gwella ecosystemau ac addasu i newid hinsawdd trwy amddiffyn cynefinoedd.

4. Ymgysylltu a chydymffurfio drwy newid ymddygiad

• Darparu rhaglen gyfathrebu ac ymgysylltu effeithiol.
• Sicrhau bod aelwydydd yn cymryd rhan ac yn ailgylchu yr holl wastraff y gellir ei ailgylchu drwy gefnogi trigolion a busnesau sy'n ei chael hi'n anodd ailgylchu a rheoli eu gwastraff.
• Annog trigolion, busnesau ac ymwelwyr i ailgylchu gartref, yn y gwaith ac "yma ac acw”
• Atal Troseddau Amgylcheddol, gan gynnwys tipio anghyfreithlon a thaflu sbwriel. 

Gallwch roi eich barn drwy lenwi'r ffurflen ymateb ar-lein.

Os hoffech gael copi papur, ffoniwch ein Canolfan Cyswllt Cwsmeriaid ar 01437 764551 neu e-bostiwch wasteandrecycling@pembrokeshire.gov.uk 

Y dyddiad cau ar gyfer ymatebion yw 19 Chwefror 2025.