Disgyblion yn cymryd i’r llwyfan ar gyfer cystadlaethau dawns

Cynhaliodd Chwaraeon Sir Benfro gystadleuaeth ddawns ar gyfer ysgolion cynradd ar 19 Mawrth yng Nghanolfan Hamdden Abergwaun.

Cymerodd saith ysgol o bob rhan o’r sir, a mwy na 160 o ddisgyblion ran, gan gynnwys bechgyn a merched o flynyddoedd ysgol 3-6.

Dawnsio pob arddull a dawnsio stryd oedd y categorïau y gallai timau, unigolion a pharau gystadlu ynddyn nhw. Roedd 55 o berfformwyr unigol yn cystadlu yn y categori dawnsio stryd unigol.

Perfformiodd disgyblion o Ysgol Bro Gwaun ddawns grŵp a pherfformiodd rhai ohonyn nhw ddawnsfeydd unigol gwych i’r disgyblion cynradd eu gwylio.

Finola (FF Dancers), Kelly (Kelly Williams School of Dance) a Lowri (Lowri Jones School of Dance) oedd yn gyfrifol am feirniadu’r cystadlaethau o safon uchel, gyda’r hyfforddwyr dawns Lucy Kerrison a Kelci Francis yn rhoi help llaw yn ystod y dydd.

Diolch i bob un ohonyn nhw am eu cymorth a’u harbenigedd gan na fyddai’n bosibl cynnal digwyddiad o’r math hwn heb eu cyfraniad gwerthfawr.

Cafodd 48 o fedalau, 22 o dlysau a nifer o dystysgrifau eu cyflwyno, gan gynnwys gwobrau i berfformwyr eithriadol.

Roedd yr awyrgylch yn wych ac roedd hi’n hyfryd gweld y disgyblion yn cymryd rhan ac yn dangos eu creadigrwydd a’u sgiliau, gyda gwên ar eu hwynebau.

Cafodd y gystadleuaeth ddawns ar gyfer ysgolion uwchradd ei chynnal ddydd Iau, 29 Chwefror yng Nghanolfan Hamdden Hwlffordd.

Gwnaeth 77 o ferched o flynyddoedd ysgol 7-11 gystadlu mewn categorïau gwahanol fel timau, parau ac unigolion. Roedd y categorïau’n cynnwys dawnsio stryd, pob arddull, arddull rydd, jazz a chodi hwyl.

Finola a Kelly oedd y beirniaid, gyda chymorth Lucy a Kelci. Rhoddodd Kelci, un o gyn-ddisgyblion Ysgol Harri Tudur, berfformiadau anhygoel hefyd.

Roedd hi’n ddiwrnod gwych gydag awyrgylch ardderchog ac roedd hi’n rhoi boddhad mawr gweld cynifer o ferched yn cymryd rhan mewn chwaraeon ac yn mwynhau pob munud.

Mae rhai o’r ysgolion a gymerodd ran drwodd nawr i Gystadleuaeth Ddawns UDOIT yng Nghaerdydd.