The Wallich i Ddarparu Gwasanaeth Atal Digartrefedd wedi'i ailwampio

Trwy lansio'r gwasanaeth atal digartrefedd wedi'i ailwampio, bydd The Wallich yn helpu mwy o bobl sydd mewn perygl o fod yn ddigartref mewn partneriaeth â Chyngor Sir Penfro drwy'r Gwasanaeth Atal Digartrefedd wedi'i ailwampio.

Nod y gwasanaeth yw atal a lleihau digartrefedd ledled Sir Benfro drwy ddarparu cymorth cynnar, sy'n canolbwyntio ar y person i bobl sy'n ddigartref neu sydd mewn perygl o golli eu cartref.

Trwy roi cyngor ymarferol, cymorth tai a chanllawiau wedi'u teilwra, bydd y gwasanaeth yn helpu pobl i ganfod, sicrhau a chynnal llety addas, gan leihau'r risg o digartrefedd mewn argyfwng a thro ar ôl tro.

Gan weithio gyda phobl ar bob cam o'u taith dai, bydd y gwasanaeth yn canolbwyntio ar greu perthnasoedd dibynadwy, hyrwyddo sefydlogrwydd tai hirdymor a sicrhau bod unigolion yn derbyn y gefnogaeth sydd ei angen arnynt i fyw'n annibynnol a ffynnu yn eu cymunedau.

Dywedodd Michael Gray, Cyfarwyddwr Gwasanaethau Cymdeithasol a Thai CSP: "Mae Cyngor Sir Penfro wedi ymrwymo i fod yn arloesol wrth ddelio â'r heriau tai sy'n ein hwynebu drwy gefnogi pobl Sir Benfro i gael mynediad at gartref addas o safon uchel, fforddiadwy ac sy'n gwella ansawdd eu bywyd.

“Rwy'n falch iawn felly o bartneru gyda The Wallich i atal a lleihau digartrefedd trwy fodel sy'n seiliedig ar weithio’n gynnar, yn berthynol gan ganolbwyntio ar y person. Mae atal digartrefedd yn waith cymhleth, ac edrychaf ymlaen at ddysgu ochr yn ochr â The Wallich ar yr hyn sy'n gweithio, i bwy a pham."

Dywedodd Liz Evans, Rheolwr Ardal The Wallich: "Rydym yn llawn cyffro i lansio Gwasanaeth Atal Digartrefedd Sir Benfro gan The Wallich, gan greu cyfleoedd newydd i gefnogi pobl yn gynt ac atal digartrefedd cyn iddo gyrraedd pwynt argyfwng.

"Trwy ddull comisiynu arloesol, a Gweithwyr Cymorth ymroddedig sy'n aros ochr yn ochr â phobl trwy gydol eu taith, gallwn ddarparu cefnogaeth gyson, sy'n canolbwyntio ar y person gan helpu unigolion i fagu hyder, gwydnwch a sefydlogrwydd tai hirdymor."

Bydd enghreifftiau o gymorth atal digartrefedd yn Sir Benfro a ddarperir gan The Wallich yn cynnwys:

• Cymorth gyda budd-daliadau
• Cyllido
• Ôl-ddyledion rhent a dyled
• Ceisiadau tai
• Archwilio opsiynau tai
• Paratoi ar gyfer apwyntiadau
• Cymorth i siarad â landlordiaid ac asiantaethau partner
• Symud tŷ
• Cynnal tenantiaeth
• Cael mynediad at gyfleoedd lles, addysg, gwirfoddoli a datblygiad personol

Mae'r gwasanaeth newydd yn ymuno â thri arall a ddarperir gan The Wallich yn Sir Benfro, gan gynnwys y Gwasanaeth Cymorth Digartrefedd ar y Stryd, y Gwasanaeth Datrys Gwrthdaro a'i Wasanaeth Creu Gofod - Celcio Holistig.

Gellir gwneud atgyfeiriadau at wasanaethau a ariennir gan y Grant Cymorth Tai (GCT) drwy'r Porth.

Mae'r Porth yn darparu un pwynt mynediad at wasanaethau a ariennir gan y GCT, gan sicrhau bod unigolion yn cael eu cyfeirio at y cymorth mwyaf priodol. Mae cymorth cymunedol ar gael i bobl sydd â thai, iechyd meddwl, anabledd dysgu, camddefnyddio sylweddau, troseddu, cam-drin domestig, anghenion oedran a chynnal tenantiaeth, yn ogystal â'r rhai sy'n ddigartref neu'n byw mewn llety dros dro.

Mae cyllid y GCT hefyd yn cefnogi ystod o wasanaethau llety, gan gynnwys llochesi cam-drin domestig, tai â chymorth i bobl ag anghenion iechyd meddwl neu gamddefnyddio sylweddau, tai gwarchod a gofal ychwanegol i bobl hŷn, a phobl sy'n cysgu allan.

I geisio mynediad at gymorth sy'n gysylltiedig â Thai, mae ffurflen atgyfeirio’r Porth ar gael drwy ymweld â https://www.sir-benfro.gov.uk/cymorth-a-thai.  Fel arall, gallwch gysylltu â'r tîm drwy e-bostio gateway@pembrokeshire.gov.uk, neu ffonio 01437 764551.