Nodi 80 Mlynedd ers Diwrnod VE yn Neuadd y Sir

Ymgasglodd cynghorwyr a staff yn Neuadd y Sir ar gyfer cyhoeddiad Diwrnod VE 80, a ddarllenwyd yn Gymraeg gan y Cynghorydd Delme Harries, Aelod Hyrwyddo’r Gymraeg ac yn Saesneg gan y Cynghorydd Simon Hancock, yr Aelod Llywyddol ac Aelod Hyrwyddo’r Lluoedd Arfog.

Codwyd baner Diwrnod VE 80 arbennig a daeth staff ac Aelodau at ei gilydd i ganu caneuon o amser y rhyfel, dan arweiniad Sarah Benbow.

Yng nghyntedd Neuadd y Sir, a oedd wedi'i haddurno â Baneri'r Undeb, roedd Archifau Sir Benfro wedi creu arddangosfa ddiddorol o eitemau newyddion lleol yn dyddio o 8 Mai 1945.

Ychwanegwyd lliw i’r achlysur gan gannoedd o bosteri gwych yn ymwneud â Diwrnod VE a grëwyd gan blant ysgol Sir Benfro.

Cafodd Neuadd y Sir ei goleuo mewn coch a glas hefyd i nodi'r diwrnod.

Dywedodd yr Aelod Llywyddol, y Cynghorydd Hancock: "Roedd yn anrhydedd darllen cyhoeddiad Diwrnod VE 80.

“Roedd yn wasanaeth hyfryd ac roedd yn wych gweld baner Diwrnod VE yn chwifio yn Neuadd y Sir.

“Fel y nododd y cyhoeddiad: 'Rydym yn cofio'r rhai a gollwyd gennym, y rhai a anafwyd neu eu creithio a'r rhai y newidiodd eu bywydau am byth gan ryfel.’

“Rydym yn diolch iddyn nhw am bopeth a wnaethant fel ein bod ni'n mwynhau ein rhyddid heddiw.”

Ychwanegodd y Cynghorydd Jon Harvey, Arweinydd Cyngor Sir Penfro: "Mae 80 mlynedd ers Diwrnod VE wedi rhoi cyfle amserol i gofio aberth cenhedlaeth yr Ail Ryfel Byd.

“Roedd yn anrhydedd cael bod yn rhan o'r coffáu yn Neuadd y Sir i dalu teyrnged a chofio'r diwrnod y sicrhawyd heddwch a datganwyd buddugoliaeth ledled Ewrop.”

Ychwanegodd y Cynghorwyr Harvey a Hancock eu diolch i dîm Archifau Sir Benfro am eu harddangosfa ddiddorol ac i blant ysgolion lleol am eu posteri gwych ar thema Diwrnod VE.

Gohiriwyd y Cyngor Llawn am 10.45am i ganiatáu i'r Aelodau fynychu gwasanaeth Diwrnod VE Cyngor Tref Hwlffordd a’r Lleng Brydeinig Frenhinol yn Sgwâr Salutation, Hwlffordd, ac arsylwyd y ddwy funud o dawelwch cenedlaethol am hanner dydd.