Agor dôl goffa blodau gwyllt yn Amlosgfa Parc Gwyn
Wildflower memorial meadow opened at Parc Gwyn Crematorium
Mae dôl goffa hardd wedi agor yn Amlosgfa Parc Gwyn, Arberth, i gynnig lle naturiol a heddychlon ar gyfer cofio a myfyrio.
Tir pori arferai fod yno, ond mae'r gwrychoedd bellach yn amgylchynu glaswellt a blodau gwyllt, sy'n cael eu rheoli er budd bioamrywiaeth a natur. Mae golygfeydd godidog ar draws cefn gwlad Sir Benfro oddi yno.
Wedi'i ddatblygu drwy gyllid Lleoedd Lleol ar gyfer Natur drwy Bartneriaeth Natur Sir Benfro, mae Dôl Goffa Parc Gwyn yn un o nifer o brosiectau natur ledled y sir a ariennir gan Lywodraeth Cymru.
Mae'r ddôl yn cynnwys cymysgedd o lwybrau, gyda nodweddion cerrig, meinciau a adeiladwyd gan Norman Industries fel rhan o raglen Cyflogaeth â Chymorth y Cyngor a llochesi pren lle gall ymwelwyr aros a myfyrio, waeth beth fo'r tywydd.
Mae creu'r ddôl goffa yn cyd-fynd â Deddf Llesiant Cenedlaethau'r Dyfodol, gan gefnogi nodau Cymru gydnerth, Cymru iachach a Chymru o gymunedau cydlynol.
Bydd yn helpu i wella bioamrywiaeth, gan ddarparu cynefinoedd ar gyfer peillwyr, adar a bywyd gwyllt arall, gan hyrwyddo lles trwy annog ymgysylltu â natur a chefnogi iechyd meddwl a chorfforol.
Diolchodd yr Aelod Cabinet dros Wasanaethau Trigolion, y Cynghorydd Rhys Sinnett, i bawb sy'n rhan o'r prosiect, cyn agor y ddôl yn swyddogol.
Ychwanegodd y Cynghorydd Sinnett: "Mae Dôl Goffa Parc Gwyn wedi'i chreu fel lle heddychlon i fyfyrio a chreu cysylltiad. Mae'n lle i bobl ddod i gofio, galaru, dathlu, neu ond i gofio anwyliaid nad ydynt gyda ni mwyach.
“Bydd yr amgylchedd 'mwy naturiol na thaclus' hwn yn annog mwy o amrywiaeth o rywogaethau planhigion ar y ddôl, gan greu hafan ddiogel i fywyd gwyllt lleol.
“Yma, ymhlith y blodau, y coed, a harddwch tawel natur, gall pobl ddod i fyfyrio, i deimlo'n agos at y rhai maen nhw wedi'u colli, ac i gael cysur yn heddwch eu hamgylchedd.
“P'un a ydych chi wedi dod i gofio anwylyd, i fwynhau'r ddôl neu ond i gael eiliad o dawelwch, bydd y lle hwn yn agored i bawb.”
Wedi'i ariannu gan grant Lleoedd Lleol ar gyfer Natur Llywodraeth Cymru, a weinyddir drwy Gyngor Gweithredu Gwirfoddol Cymru (CGGC), roedd cyflawni'r prosiect yn ymdrech ar y cyd rhwng Partneriaeth Natur Sir Benfro a Chyngor Sir Penfro.
Mae'r ddôl wedi'i chynllunio i fod yn lle parhaol i'r gymuned ei fwynhau am genedlaethau i ddod a bydd yn gartref i amrywiaeth o gofebion a fydd ar gael i'w prynu yn ystod y misoedd nesaf, ynghyd â lleiniau claddu ar gyfer gweddillion wedi’u hamlosgi ar gyfer teuluoedd.