Cyngor ar gostau byw i breswylwyr Sir Benfro, wedi’i lywio gan breswylwyr Sir Benfro
Cost of Living advice for Pembrokeshire residents, shaped by Pembrokeshire residents
Gall unrhyw un sy’n chwilio am gyngor neu help gyda chostau cynyddol a’r effaith ar fywydau ddod o hyd i’r hyn sydd ei angen arnyn nhw mewn un lle ar wefan Cyngor Sir Penfro.
P’un ai yw’n help gyda biliau, cyngor ar reoli arian a dyledion, ymweld â mannau cynnes, dod o hyd i gymorth ar faterion tai neu gyda chostau addysg ac ysgol, mae gwybodaeth ar gael ar y tudalennau Costau Byw pwrpasol
Mae adrannau eraill yn cynnwys help i ddod o hyd i waith a hyfforddiant, iechyd a llesiant yn ogystal â chymorth gyda bwyd, gofal plant a chymorth i bobl hŷn.
Ym mhob adran mae llawer o wahanol bwyntiau gwybodaeth a dolenni wedi’u cynllunio i gyfeirio preswylwyr at y gefnogaeth sydd ar gael a sut i fanteisio arno ar lefel genedlaethol a lleol.
Gwnaeth preswylwyr Sir Benfro helpu i lunio’r tudalennau newydd drwy gymryd rhan mewn profion defnyddioldeb a rhoi adborth gwerthfawr i sicrhau bod yr holl gymorth costau byw a’r wybodaeth sydd wedi’i darparu yn hygyrch.
Dywedodd Aelod y Cabinet dros Welliant Corfforaethol a Chymunedau, y Cynghorydd Neil Prior: "Roedd y mewnbwn gan breswylwyr i wneud y tudalennau gwe pwrpasol hyn yn hygyrch yn hynod o bwysig, ac mae cael cyfoeth o wybodaeth felly i helpu i gefnogi unrhyw un sy’n cael trafferth yn y cyd-destun ariannol presennol yn adnodd hanfodol."
Hoffai Cyngor Sir Penfro barhau i weithio gydag aelodau’r cyhoedd, i brofi a gwella gwasanaethau ar-lein. Mae cronfa ddata o ddarpar ymgeiswyr ymchwil yn cael ei datblygu a gall trigolion lleol ymuno drwy lenwi ffurflen mynegi diddordeb.