Dathlu llwyddiant y cynllun peilot People PWR wrth gefnogi teuluoedd

Lansiwyd People PWR yn 2023 ac mae’n brosiect peilot sy’n defnyddio ymagwedd holistig i gefnogi teuluoedd sy’n dioddef neu mewn perygl o ddioddef tlodi a’r effeithiau cysylltiedig.

Mae tîm People PWR, wedi’u hysbrydoli gan lwyddiant Maximise! yn yr Alban, yn canolbwyntio ar ymgysylltu â theuluoedd sydd â phlant oed ysgol, gyda’r nod clir o gynyddu sefydlogrwydd ariannol i aelwydydd, mynd i’r afael ag anghydraddoldebau a gwella gallu ariannol.

Er bod teuluoedd yn gallu hunanatgyfeirio i’r prosiect, ysgolion yw’r prif lwybr atgyfeirio, ac mae’r cysylltiadau gweithio agos a ddatblygwyd rhwng CAP ac Ysgolion Sir Benfro wedi bod yn allweddol i lwyddiant y prosiect hwn.

Pan dderbynnir atgyfeiriad, maen nhw’n cynnal archwiliad ariannol, i bob pwrpas, sy’n canolbwyntio ar hawliau lles a chynyddu incwm i’r eithaf, gan sicrhau bod cleientiaid yn hawlio popeth sydd ar gael iddynt ar yr un pryd â helpu teuluoedd i adnabod a mynd i’r afael â’r materion sylfaenol sy’n cyfrannu at galedi.

Yn 2023, roedd 259 o deuluoedd wedi elwa o gymorth People PWR ac mae’r tîm wedi sicrhau enillion ariannol gwerth £118,347 i deuluoedd lleol mewn budd-daliadau heb eu hawlio. Enillodd pob teulu £2,878 ar gyfartaledd.

Fodd bynnag, mae’n ymwneud â mwy na’r arian. Mae o fudd parhaol i deuluoedd trwy roi dealltwriaeth well iddynt, mwy o hyder ac, yn aml, teimlad o rymuso sy’n gallu eu helpu i gyflawni dyfodol ariannol mwy cadarnhaol.

Dywedodd James White, Pennaeth Ymgysylltu a Chymunedau: “Rwy’n falch iawn â’r hyn y mae People PWR eisoes wedi’i gyflawni yn ei flwyddyn gyntaf. 

“Mae mwy a mwy o gleientiaid yn cael eu helpu wrth i’r si am y gwasanaeth fynd ar led, ac mae bron £120,000 wedi cael ei roi ym mhocedi preswylwyr Sir Benfro, y bydd y rhan fwyaf ohono’n cael ei wario’n lleol.

“Mae’r gwasanaeth hwn wedi newid bywyd rhai cleientiaid. Edrychaf ymlaen at weld y prosiect yn parhau i dyfu ac ymestyn ei gyrhaeddiad ymhellach yn ystod y flwyddyn i ddod.”

Dywedodd Geraldine Murphy, Prif Weithredwr Cyngor ar Bopeth Sir Benfro: “Yn ystod blwyddyn gyntaf y prosiect, mae ein tîm o dri chynghorydd yn mynd o nerth i nerth. 

“Maen nhw’n frwdfrydig ynglŷn â helpu rhieni i ganfod atebion i’w problemau ariannol. Maen nhw wedi ffurfio cysylltiadau cryf ag ysgolion a sefydliadau cymunedol ac mae penaethiaid a swyddogion ymgysylltu’n dweud wrthym eu bod eisoes wedi gweld budd ein gwasanaeth i’w rhieni a’u plant. Gyda’n gilydd, rydym yn creu ffordd effeithiol a chydgysylltiedig o helpu teuluoedd.”

Os ydych chi’n deulu sydd â phlentyn oed ysgol yn Sir Benfro ac yn credu y gallech elwa o gysylltu â thîm People PWR, ewch i wefan CAB Sir Benfro i gael mwy o wybodaeth am y prosiect neu anfonwch neges e-bost at Pwr@pembscab.org i gysylltu â’r tîm yn uniongyrchol i ofyn am gymorth.

Yn y llun Nerys Evans, Sarah Smith and Meredith Fletcher o People PWR