Dathlu llyfrgell newydd ar gyfer Canolfan Ddysgu Sir Benfro

Wedi'i chynllunio i ysbrydoli cariad at ddarllen, mae'r llyfrgell yn chwarae rhan allweddol wrth feithrin diwylliant darllen cryf o fewn y Ganolfan, gan annog myfyrwyr o bob oedran a gallu i roi cynnig ar lenyddiaeth a datblygu arferion dysgu gydol oes.

Mae’r llyfrgell yn gartref i gannoedd o lyfrau newydd ac ystod eang o genres, ac mae’n cynnig rhywbeth at ddant pawb ac yn parhau i dyfu trwy system ceisiadau myfyrwyr, gan ganiatáu i deitlau newydd gael eu hychwanegu yn seiliedig ar ddiddordebau unigol.

Yn ogystal â hyn, mae'r llyfrgell yn cefnogi dysgu trwy sesiynau darllen strwythuredig dan arweiniad, gan gynnwys defnyddio'r strategaeth ddarllen ‘Fusion’, sy’n sicrhau bod myfyrwyr yn cael eu cefnogi i ddatblygu sgiliau dealltwriaeth a meddwl beirniadol wrth fwynhau mynediad at gasgliad rhagorol sy'n ehangu'n barhaus.

Dywedodd y Pennaeth Cynorthwyol, Michelle Lewis-Jones: "Daeth llawer iawn o bobl i’r digwyddiad, sy’n adlewyrchu'r brwdfrydedd ar draws y ganolfan am y lle newydd bywiog hwn. Mae hefyd yn gwasanaethu fel canolfan groesawgar yn ystod amser cinio, gan ddarparu amgylchedd tawel a diddorol i fyfyrwyr ymlacio a darllen.

“Fel rhan o'n hymrwymiad i gryfhau llythrennedd, rydym hefyd yn cyflwyno'r rhaglen ‘Llythrennau a Synau Hanfodol’, gan ymgorffori ein diwylliant darllen newydd ymhellach a chefnogi myfyrwyr i ddatblygu sgiliau darllen sylfaenol cryf.”

Ychwanegodd y Cynghorydd Sir lleol ac aelod o Bwyllgor Rheoli Canolfan Ddysgu Sir Benfro, y Cynghorydd Simon Hancock: "Rwy'n falch iawn o weld y llyfrgell newydd yn agor. Bydd hwn yn lle diogel a chynhwysol lle gall y bobl ifanc gael gafael ar ystod eang o lyfrau a deunyddiau dysgu eraill. Rwy'n siŵr y bydd yn gyfleuster poblogaidd iawn yng Nghanolfan Ddysgu Sir Benfro yn ôl y sylwadau a glywais gan y bobl ifanc y siaradais â nhw yn yr agoriad.”