Disgyblion Sir Benfro yn lansio’r Addewid i Ddisgyblion y Lluoedd Arfog cyntaf yng Nghymru

Mae’r fenter hon yn ffurfio’r Addewid i Ddisgyblion y Lluoedd Arfog cyntaf yng Nghymru, sy’n cwmpasu teuluoedd y lluoedd arfog ar draws yr awdurdod lleol.

Gwelodd y prosiect bron i 70 o blant y lluoedd arfog yn dod ynghyd i helpu datblygu’r addewid, gan roi llais uniongyrchol iddynt wrth lunio sut mae ysgolion a’r awdurdod lleol yn eu cefnogi.

Ei nod yw cryfhau dealltwriaeth o’r heriau unigryw y mae disgyblion y lluoedd arfog yn eu hwynebu, fel symud o gwmpas yn aml a’u rhieni’n cael eu symud o fan i fan, wrth hyrwyddo cysondeb, ymdeimlad o berthyn, a llesiant emosiynol mewn addysg.

Dywedodd y plant ei bod hi’n bwysig iddyn nhw fod eu cyfoedion a’u hathrawon yn deall sut beth yw bywyd i blant y lluoedd arfog.

Mae datblygu Addewid i Ddisgyblion y Lluoedd Arfog lleol a chlir yn dod ag ysgolion, teuluoedd a phartneriaid cymunedol ynghyd i sicrhau bod pob plentyn yn y lluoedd arfog yn teimlo ei fod yn cael ei werthfawrogi a’i gefnogi i gyflawni ei botensial llawn.

Mae’r fenter hon hefyd yn atgyfnerthu ymrwymiad parhaus yr awdurdod lleol i Gyfamod y Lluoedd Arfog, gan sicrhau bod y rhai sy’n gwasanaethu, neu sydd wedi gwasanaethu, a’u teuluoedd yn cael eu trin yn deg ac yn cael y cymorth y maent yn ei haeddu.

Mae’r Addewid i Ddisgyblion y Lluoedd Arfog yn cynnwys codi ymwybyddiaeth, hyfforddi staff ysgolion a chysylltu ysgolion trwy rwydwaith Hyrwyddwyr Plant Lluoedd Arfog Sir Benfro i rannu syniadau gorau.

Fel y cyntaf o’i fath yng Nghymru, mae’r Addewid i Ddisgyblion y Lluoedd Arfog yn gosod esiampl gref o arferion gorau, ac mae’r awdurdod lleol yn gobeithio y bydd cynghorau eraill ledled Cymru yn gwneud yr un peth, gan weithio ar y cyd i feithrin diwylliant cenedlaethol o ddealltwriaeth, parch a chefnogaeth i ddisgyblion y lluoedd arfog a’u teuluoedd.

“Mae datblygu’r Addewid i Ddisgyblion y Lluoedd Arfog yn ymwneud â chydnabod a dathlu profiadau unigryw plant y lluoedd arfog, gan sicrhau eu bod yn teimlo eu bod yn cael eu deall, eu cefnogi a’u gwerthfawrogi’n llawn o fewn ein hysgolion a’n cymuned.

“I ni fel awdurdod lleol, nid dim ond addewid yw hwn; mae’n ymrwymiad i wrando, dysgu a gweithio gyda’n gilydd fel y gall pob disgybl o deulu yn y lluoedd arfog ffynnu, ni waeth ble mae eu taith yn mynd â nhw,” meddai Kelly Hamid – Rheolwr Gwasanaeth Lles Addysg.

Dysgwch fwy am presenoldeb ysgolion a lles disgyblion ar lein.