Gweinidog Llywodraeth Cymru yn agor Parc Eco Sir Benfro yn swyddogol

Mae'r Parc Eco newydd, sydd wedi bod yn weithredol ers 14 Tachwedd 2024, yn cynrychioli buddsoddiad sylweddol yn nyfodol amgylcheddol Sir Benfro, gan ddarparu cyfleusterau modern sy'n cefnogi rheoli gwastraff yn gynaliadwy, adfer adnoddau a'r pontio tuag at economi fwy cylchol.

Yn ystod y seremoni agoriadol, ymunodd y Gweinidog Llyr Gruffydd ag Aelod Cabinet y Cyngor dros Wasanaethau Preswyl, y Cynghorydd Rhys Sinnett, swyddogion awdurdodau lleol, partneriaid a rhanddeiliaid i ddathlu cwblhau'r cyfleuster a chydnabod ei bwysigrwydd wrth helpu Sir Benfro i leihau gwastraff, cynyddu ailgylchu a chefnogi nodau cynaliadwyedd uchelgeisiol Cymru.

Mae'r Parc Eco wedi'i gynllunio i wneud y mwyaf o werth deunyddiau sy’n cael eu casglu ledled y sir, gan helpu i leihau effeithiau amgylcheddol wrth wella effeithlonrwydd gweithredol a chefnogi cymunedau glanach, gwyrddach.

Dywedodd y Cynghorydd Rhys Sinnett, Aelod Cabinet dros Wasanaethau Preswyl:

"Mae Parc Eco Sir Benfro yn garreg filltir bwysig yn ein hymrwymiad i greu dyfodol mwy cynaliadwy i'n sir. Bydd y cyfleuster hwn yn ein helpu i reoli adnoddau'n fwy effeithiol, cefnogi ein huchelgeisiau amgylcheddol a darparu manteision hirdymor i drigolion a chymunedau ledled Sir Benfro.

“Rydym yn falch iawn o groesawu Llyr Gruffydd i agor y Parc Eco yn swyddogol a nodi'r cyflawniad pwysig hwn."

Wrth siarad cyn y digwyddiad, dywedodd Llyr Gruffydd, Gweinidog y Cabinet dros Wydnwch Gwledig a Chynaliadwyedd: "Mae Parc Eco Sir Benfro yn dangos sut y gall awdurdodau lleol gasglu deunyddiau i'w hailgylchu a'u cadw yng Nghymru, a thrwy wneud hynny, helpu busnesau lleol i dyfu.

“Bydd yn helpu Sir Benfro i barhau i fod yn un o'r awdurdodau lleol gorau yng Nghymru ar gyfer ailgylchu a chadw Cymru'n perfformio fel yr ail genedl orau yn fyd-eang ar gyfer ailgylchu.

“Llongyfarchiadau i Gyngor Sir Penfro am adeiladu'r cyfleuster newydd pwysig hwn."

Bydd y Parc Eco yn cefnogi ymrwymiad ehangach Cyngor Sir Penfro i stiwardiaeth amgylcheddol, lleihau carbon a darparu gwasanaethau cynaliadwy, gan helpu i sicrhau bod adnoddau'n cael eu defnyddio'n effeithlon er budd cenedlaethau'r presennol a'r dyfodol.

Ffeil ffeithiau:

• Cafodd 73.6% o'r holl wastraff ei ailgylchu yn 2024/25, gan wneud Sir Benfro'r awdurdod ailgylchu sy'n perfformio orau yng Nghymru
• 44,000 tunnell o wastraff wedi'i ailgylchu ledled Sir Benfro yn 2024-25
• Gweithredoedd bychan yn bwysig: Mae ailgylchu dim ond dwy botel wydr yn arbed digon o ynni i ferwi dŵr ar gyfer pum cwpan o de
• Gellir ailgylchu gwydr, dur a chaniau alwminiwm dro ar ôl tro heb golli ansawdd