Tenantiaid newydd yn ymuno â’r gymuned fusnes yng Nghanolfan Arloesedd y Bont

Sefydlwyd JCT EHS Ltd, cwmni hyfforddi ac ymgynghori sy'n gweithio yn y sector adeiladu, ym 1997 fel busnes teuluol ac mae'r Cyfarwyddwr Tanya Cooze-Smith bellach yn dod â hyfforddiant i Ganolfan Arloesedd y Bont.

Mae Whitestone Media Group wedi symud yn ddiweddar i swyddfeydd newydd yng Nghanolfan Arloesedd y Bont, Doc Penfro fel rhan o’u cynlluniau ehangu. Sefydlwyd Whitestone Media yn ystod y cyfnod clo yn 2020 gan Dayne a Liby Stone gyda'r nod o ddarparu cyfryngau, marchnata a dylunio gwefannau cost isel ac effeithiol iawn i fusnesau ar adeg pan oedd gwelededd yn golygu goroesi.

Mewn ymateb i gynnydd sylweddol yn y galw am hyfforddiant ac ymgynghoriaeth benodol i adeiladu, mae JCT wedi ehangu ei wasanaethau ac wedi nodi angen am gyfleuster hyfforddi pwrpasol. Mae’r cwmni wedi defnyddio Canolfan Arloesedd y Bont eisoes i ddarparu hyfforddiant, felly roedd yn glir mai dyma’r ateb perffaith i anghenion y cwmni.

Wrth siarad am symud i’r ganolfan, dywedodd Tanya: “Mae’r cyfleusterau a’r gefnogaeth gan y tîm yng Nghanolfan Arloesedd y Bont wedi gwneud gwahaniaeth enfawr i’r hyn y gallwn ei gynnig, gan ein galluogi i ddarparu hyfforddiant proffesiynol o ansawdd uchel a chefnogi ein cleientiaid yn well. Rydym yn llawn cyffro am y misoedd nesaf ac yn edrych ymlaen at gydweithio’n agos â’n partneriaid a’n cleientiaid wrth i ni barhau i dyfu a datblygu gyda’n gilydd.”

“Trodd y byd busnes ar ei ben yn ystod y pandemig a gwelsom fod galw mawr am ein sgiliau er mwyn helpu cwmnïau i addasu i’r normal newydd, parhau i fasnachu a dod o hyd i ffyrdd newydd o ragori”, meddai Liby, o Whitestone Media Group.

Chwe blynedd yn ddiweddarach, mae Whitestone bellach yn cefnogi miloedd o fusnesau, gan reoli cannoedd o wefannau bob mis a gyrru twf digidol cyson ar draws sawl sector. Mae'r tîm wedi dylunio ac argraffu mwy na 3,000,000 o daflenni, baneri, cardiau busnes a deunyddiau hyrwyddo, ochr yn ochr â chyflawni prosiectau ffilmio ar draws pum cyfandir.

Mae gweithredu o Ganolfan Arloesedd y Bont yn cryfhau gallu Whitestone i gydweithio, cefnogi a hyrwyddo mentrau lleol wrth barhau i gyflawni canlyniadau ar lwyfan ehangach.

Dywedodd Peter Lord, Prif Swyddog Datblygu Busnes y Cyngor: “Rydym yn falch o groesawu cwmni arloesol arall i Ganolfan Arloesedd y Bont. Mae Whitestone yn dod ag elfen newydd i'r cymysgedd o denantiaid yn y ganolfan ac rydym yn edrych ymlaen at eu cefnogi yn eu twf.”

Ychwanegodd Cydlynydd Busnes Canolfan Arloesedd y Bont, Michelle Francis:  “Rydym wrth ein bodd i groesawu Tanya a thîm JCT fel tenantiaid. Mae menywod yn parhau i fod heb gynrychiolaeth ddigonol mewn sectorau sy’n cael eu dominyddu gan ddynion yn draddodiadol, felly rydym yn arbennig o falch bod Tanya wedi dewis lleoli pencadlys ei busnes yng Nghanolfan Arloesedd y Bont. Edrychwn ymlaen at gefnogi datblygiad parhaus JCT yma yn Sir Benfro.” 

Mae Canolfan Arloesedd y Bont, sy’n cael ei rhedeg gan Gyngor Sir Penfro, yn cynnig gofod swyddfa o ansawdd uchel ochr yn ochr â system gefnogol o gyfleoedd rhwydweithio, gweithdai cymorth busnes ac opsiynau gweithle hyblyg a gynlluniwyd i helpu cwmnïau lleol i dyfu a llwyddo. Am ragor o wybodaeth, ewch i www.bridgeinnovation.co.uk neu anfonwch e-bost at BusinessSupport@pembrokeshire.gov.uk