System rheoli llyfrgelloedd newydd ar gyfer Llyfrgelloedd Sir Benfro

Bydd y system bresennol yn cael ei disodli gan system dros dro gan y cyflenwr newydd ar gyfer rheoli benthyciadau a dychwelyd llyfrau.

Yn ystod y cyfnod o newid ni fydd gwasanaethau fel archebion/ceisiadau, catalog ar-lein a pheiriannau hunanwasanaeth ar gael.

Bydd y llyfrgelloedd yn newid i'r system newydd gan ddechrau o ddydd Mercher, 28 Mai, pan ddylai'r gwasanaeth arferol ailddechrau.

Mae Llyfrgelloedd Sir Benfro wedi ymuno â chonsortiwm Gwasanaeth Llyfrgelloedd Cyhoeddus Cymru gyfan. Mae'r newid cyflenwr wedi ei gefnogi gyda chyllid grant gan Lywodraeth Cymru.

Bydd y gwasanaeth newydd yn gwella'r ansawdd i gwsmeriaid ac yn costio llai na'r system bresennol.

Mae manteision y system newydd yn cynnwys gwell catalog ar-lein gyda rhyngwyneb hawdd ei ddefnyddio, rheoli cyfrifon gwell, mynediad haws i e-lyfrau, e-lyfrau sain ac asedau digidol eraill yn ogystal â chalendr o ddigwyddiadau. 

Ar hyn o bryd, nid oes unrhyw gynlluniau i gau unrhyw lyfrgelloedd, gan gynnwys y Gwasanaeth Symudol a Llyfrgell yn y Cartref, tra bod y gwaith yn cael ei wneud. Fodd bynnag, ni fydd mynediad heb staff yn llyfrgelloedd Arberth a Neyland ar gael nes bod y newid wedi'i gwblhau.

Byddwch yn parhau i allu benthyg llyfrau, ond rhaid i chi ddod â'ch cerdyn llyfrgell gyda chi gan na fydd staff yn gallu chwilio am eich manylion.

Bydd dyddiadau benthyca yn cael eu hymestyn ar gyfer eitemau sy'n ddyledus rhwng 8 Mai a 14 Mehefin i 16 Mehefin (neu'r diwrnod agored nesaf ar gyfer eich llyfrgell). Ni fydd unrhyw daliadau hwyr yn ystod y cyfnod hwn, ond bydd unrhyw ddyled bresennol yn cario drosodd i'r system newydd.

Bydd dwy flynedd o hanes benthyciadau yn cario drosodd i'r system newydd. Gallwch lawrlwytho eich hanes benthyciadau llawn o'r catalog ar-lein cyfredol cyn dydd Mercher, 7 Mai ar dudalen we y Gwasanaeth Llyfrgell www.sir-benfro.gov.uk/llyfrgelloedd-a-diwylliant

Dywedodd yr Aelod Cabinet dros Wasanaethau Trigolion, y Cynghorydd Rhys Sinnett: "Bydd rhywfaint o darfu ar wasanaethau'r llyfrgell wrth i ni newid i'r system reoli newydd ac wrth i'n staff llyfrgell ddysgu sgiliau newydd, bydd rhywfaint o darfu ar ein e-adnoddau, felly byddwch yn amyneddgar.

“Os bydd cwsmeriaid yn cofio dod â'u cerdyn llyfrgell i'r llyfrgell, gallwch barhau i fenthyg llyfrau fel arfer. O ddydd Mercher 28 Mai, byddwn yn dechrau defnyddio'r system newydd a gwell."

Dyddiadau defnyddiol

Sylwch y gallai rhai o'r dyddiadau hyn fod yn destun newid.

• Dydd Mercher, 9 Ebrill
  • o Y dyddiad olaf y gellir gosod unrhyw Archebion, Ceisiadau Stoc neu Geisiadau Benthyciad Rhwng Llyfrgelloedd (gan gynnwys Grwpiau Darllen)’.
• Dydd Mercher, 7 Mai
  • o Y dyddiad olaf y gallwch ddefnyddio peiriannau Hunanwasanaeth a mynediad heb staff Agor a Mwy
  • o Y dyddiad olaf y byddwn yn anfon Hysbysiadau Cwrteisi a Hysbysiadau Hwyr
• Dydd Iau, 8 Mai i ddydd Sadwrn, 14 Mehefin
  • o Ni fydd unrhyw eitemau yn ddyledus i’w dychwelyd yn ystod y cyfnod hwn, bydd popeth yn cael ei ymestyn tan ddydd Llun, 16 Mehefin (neu ddiwrnod gwaith nesaf ar gyfer eich llyfrgell leol).
• O ddydd Mercher, 28 Mai
  • o Dyddiad disgwyliedig ar gyfer dechrau defnyddio'r system newydd (yn dibynnu ar ddiwrnodau agor y Llyfrgell).