Ail gam datblygiad cartrefi newydd ar hen safle ysgol wedi’i gwblhau

Mae Cyngor Sir Penfro yn dathlu cwblhau’n llwyr ddatblygiad Lôn yr Hen Ysgol, a gafodd ei adeiladu gan WG Griffiths, carreg filltir bwysig i’r Awdurdod Lleol.

Cafodd cam cyntaf y datblygiad tai ei gwblhau ddiwedd y llynedd - y tai Cyngor cyntaf i gael eu hadeiladu mewn 25 mlynedd - a chyn bo hir bydd mwy o drigolion yn symud i mewn.

Wedi’i adeiladu ar hen safle Ysgol Johnston, mae’r datblygiad yn cynnwys Buddion Cymunedol fel rhodd o lyfrau i Ysgol Gynradd Gymunedol bresennol Johnston.

Dywedodd y Pennaeth Dros Dro, Mr Ross Williams: “Diolch yn fawr iawn i Gyngor Sir Penfro sydd wedi ein helpu ni i barhau i ddatblygu ein Cynnig Llyfrau Craidd Unigryw; lle mae disgyblion yn darllen testunau o ansawdd uchel wedi’u mapio ar draws pob grŵp blwyddyn."

Dywedodd y Cynghorydd Michelle Bateman, Aelod y Cabinet dros Dai: "Mae cynyddu ein cyflenwad o eiddo cyffredinol, eiddo â chymorth ac eiddo wedi’i addasu yn allweddol i’n Rhaglen Datblygu Tai.

"Bydd y cartrefi newydd hyn yn wych i’r tenantiaid newydd hynny sy’n symud i mewn ac ar ôl datblygu polisi gosod lleol ar y cyd â Chyngor Cymuned Johnston, bydd pobl leol yn gallu byw yn eu cymuned gartref eto."

Mae’r datblygiad yn cynnwys 33 o gartrefi newydd sy’n cynnwys cymysgedd o eiddo gydag o un i bum ystafell wely.

Mae’r eiddo wedi’i adeiladu i fodloni lefelau effeithlonrwydd ynni uchel i helpu i gadw costau cynnal i lawr ac wedi’i gynllunio ar gyfer mwy o hyblygrwydd hygyrchedd yn y dyfodol, gan greu ‘cartref am oes’.

Mae hyn yn cynnwys ystafelloedd gwlyb ar y llawr gwaelod ym mhob eiddo ynghyd â drysau trothwy isel.

Y tu allan i’r datblygiad mae palmentydd bloc hydraidd, gan helpu i leihau’r straen ar y system ddraenio bresennol a gwella’r ffordd y gall dŵr wyneb ddraenio i ffwrdd.

Yn y llun: Ross Williams y Pennaeth Dros Dro a disgyblion Ysgol Gynradd Johnston yn derbyn rhoddion o lyfrau gan y cynllun Buddion Cymunedol.