Ysgol Caer Elen yn dathlu llwyddiant ysgubol adroddiad Estyn

Arolygwyd yr ysgol Gymraeg ym mis Chwefror a chanfu'r Arolygwyr fod yr ysgol yn “gymuned ofalgar a chynhwysol Gymreig lle mae disgyblion yn cael cyfleoedd gwerthfawr i ddatblygu.”

Fe wnaeth yr adroddiad ddarganfod y canlynol:

• Mae'r Pennaeth a'r uwch dîm rheoli yn angerddol ac yn cynnal y safonau uchaf ar gyfer staff a disgyblion.
• Mae arweinwyr yn gweithio'n galed wrth adeiladu dilyniant parhaus sy'n caniatáu i Ysgol Caer Elen weithredu fel ysgol lwyddiannus i bob oed.
• Mae disgyblion yn ymddwyn yn dda iawn. Maen nhw’n gwrtais ac yn trin ei gilydd ac oedolion yn gwrtais a gyda pharch. Maen nhw’n dangos mwynhad ym mywyd yr ysgol a boddhad gyda'u dysgu.
• Mae gan y rhan fwyaf o ddisgyblion ymwybyddiaeth gref o bwysigrwydd byw bywyd iach, yn gorfforol ac yn feddyliol. Maen nhw’n cymryd rhan barod mewn cyfleoedd i gadw'n heini a dysgu am eu hiechyd a'u lles.
• Mae agweddau disgyblion tuag at eu haddysg a'r iaith Gymraeg yn dda iawn.
• Mae'r ddarpariaeth i gefnogi disgyblion ag anghenion dysgu ychwanegol yn gynhwysfawr iawn.
• Mae gweledigaeth glir i greu ysgol sy'n 'sefydliad sy'n dysgu'.
• Mae'r holl staff a disgyblion yn cofleidio arwyddair yr ysgol, 'Daw derwen fawr o fesen fach' ac yn cymryd perchnogaeth o'u rolau a'u cyfrifoldebau.

Amlygodd yr adroddiad fod gan ddisgyblion lais gweithredol ym mywyd yr ysgol.

Dywedodd: “Nodwedd ragorol o waith yr ysgol yw ystod o gyfleoedd gwerthfawr sydd ar gael i ddisgyblion ddatblygu eu sgiliau llythrennedd, rhifedd a digidol ar draws meysydd perthnasol y cwricwlwm.

“O ganlyniad, mae llawer o ddisgyblion yn gwneud cynnydd cryf ac yn cyrraedd safonau uchel yn eu sgiliau, yn enwedig eu sgiliau darllen a digidol.”

Canfuwyd bod yr ysgol yn dathlu Cymreictod ac yn hyrwyddo pob cyfle i ddatblygu fel dysgwyr dwyieithog hyderus.

Wedi’i amlygu ymhellach yn yr adroddiad oedd:

• Nodwedd ragorol o waith yr ysgol yw ystod o gyfleoedd gwerthfawr sydd ar gael i ddisgyblion ddatblygu eu sgiliau llythrennedd, rhifedd a digidol ar draws meysydd perthnasol y cwricwlwm. O ganlyniad, mae llawer o ddisgyblion yn gwneud cynnydd cryf ac yn cyrraedd safonau uchel yn eu sgiliau
• Ar draws yr ysgol, mae perthynas waith ardderchog rhwng staff a disgyblion. Mae'r staff wedi llwyddo i greu ethos cynhwysol, cartrefol a pharchus ym mhob dosbarth.
• Mae arweinyddiaeth gref wedi cyfrannu at sicrhau safonau uchel o les, cynnydd cadarn disgyblion, ac addysgu effeithiol.

Bydd argymhellion i ehangu'r ystod o gyrsiau yng Nghyfnod Allweddol 4 a chryfhau'r ddarpariaeth ar gyfer addysg bersonol a chymdeithasol yng Nghyfnod Allweddol 4 yn mynd rhagddynt yn awr.

Croesawodd y Pennaeth Dafydd Hughes yr adroddiad. Dywedodd: “Ers agor ei drysau yn 2018 mae Ysgol Caer Elen wedi datblygu i fod yn Ysgol Gymraeg 3-16 mlwydd oed ffyniannus.

“Mae adroddiad Estyn yn cadarnhau bod yr ysgol yn darparu'r cymorth addysgol, diwylliannol a lles sy'n hanfodol i ddisgyblion er mwyn iddynt gyflawni eu potensial a chyflawni eu dyheadau.

“Mae cydweithio effeithiol rhwng llywodraethwyr, staff, yr awdurdod lleol, rhieni/gofalwyr a disgyblion wrth wraidd popeth yr ydym ni’n ymdrechu i'w gyflawni.

“Hoffwn ddiolch i bob aelod o gymuned Ysgol Caer Elen am wneud cyfraniad mor bwysig tuag at ddatblygiad yr ysgol.

“Mae'n fraint gallu arwain y tîm hwn a sicrhau bod ein disgyblion gwych yn gallu tyfu o fes bach i fod yn dderw cryf.”   

Dywedodd y Cynghorydd Guy Woodham, Aelod Cabinet Cyngor Sir Penfro dros Addysg a Dysgu Gydol Oes: “Rwy'n llongyfarch ar arolygiad gwych gan Estyn i bawb yn Ysgol Caer Elen.

“Nid yw canlyniadau fel hyn yn digwydd ar ddamwain, maen nhw’n ganlyniad i bawb yn gweithio'n galed, yn cyd-dynnu ac yn ymdrechu am ragoriaeth barhaus.”